ન્યૂઝ18 ગુજરાતી : ભારતના (India) વડા પ્રધાન નરેન્દ્ર મોદી (Prime Minister Narendra Modi) આજે હ્યુસ્ટનના (Houston) એનઆરજી સ્ટેડિયમ (NRG Stadium) ખાતે હાઉડી મોદી (Howdy Modi) ભારતીય સમુદાયને સંબોધિત કરવાના છે. ભારતમાં બીજી વખત સત્તા ઉપર આવ્યા બાદ આ પહેલો અવસર છે જ્યારે મોદી અમેરિકામાં વસતા ભારતીયોને સંબોધિત કરવના છે. આ ઉપરાંત આ પહેલીવાર છે જ્યારે અમેરિકી રાષ્ટ્રપતિ ડોનાલ્ડ ટ્રમ્પ (Donald Trump) આટલી મોટી સંખ્યામાં ભારતીય સમુદાયને સંબોધિત કરવાના છે.
સ્ટેડિયમમાં વડાપ્રધાન નરેન્દ્ર મોદીના સ્વાગત માટે 50 હજારથી વધુ ભારતીયો હાજર રહેશે. આ કાર્યક્રમ ભારતીય સમય અનુસાર રાત્રે 8.30 વાગ્યાથી શરૂ થશે. હ્યુસ્ટનનું એનઆરજી ફૂટબોલ સ્ટેડિયમ અમેરિકાના મોટા સ્ટેડિયમમાનું એક છે. ટેક્સાસ ઇન્ડિયા ફોરમ દ્વારા આ કાર્યક્રમનું આયોજન કરાયું છે.
મહત્વનું છે કે લગભગ 1000 જેટલા ગુજરાતીઓ નવરાત્રીના પડઘમ વચ્ચે દાંડિયા રમશે. ટેક્સાસ ઇન્ડિયા ફોરમના પ્રવક્તા ગિતેશ દેસાઈએ જણાવ્યું કે 48 રાજ્યોમાંથી ભારતીયો આ ઐતિહાસિક સમારંભના સાક્ષી બનવા માટે આવી રહ્યાં છે. હ્યુસ્ટનમાં આ પહેલા આવું કોઈ મોટું આયોજન થયું નથી. એટલું જ નહીં અમેરિકી રાષ્ટ્રપ્રમુખ હિસ્સો લેવાના હોઈ તેવી પણ પ્રથમ ઘટના છે. આ સમારંભમાં ભાગ લેવા આવનારા લોકો માટે 100થી વધુ બસોની વ્યવસ્થા કરવામાં આવી છે.
જે સ્ટેડિયમમાં આ કાર્યક્રમ છે ત્યાં હજારો લોકોની બેસવાની વ્યવસ્થા કરવામાં આવી છે. અહીં કાર્યક્રમની તૈયારીઓ જોર-શોરથી ચાલી રહી છે. અહીં એક ભવ્ય સ્ટેજ બનાવવામાં આવ્યું છે. જ્યાંથી પીએમ સંબોધન કરશે. નરેન્દ્ર મોદીનાં ભાષણ પહેલાં અહીં સાંસ્કૃતિક કાર્યક્રમનું પણ આયોજન કરવામાં આવ્યું છે.
અહીં ડોનાલ્ડ ટ્રમ્પની સાથે ઘણાં અમેરિકન સાંસદ પણ હાજર રહેવાના છે. આ કાર્યક્રમને હાઉડી મોદી નામ આપવામાં આવ્યું છે. ઐતિહાસિક જીત પછી વડાપ્રધાન મોદીની આ પહેલી અમેરિકાની મુલાકાત છે.
