વાપી: યુવકને જાહેરમાં જ મરાયો બેરહમીપૂર્વક માર, ત્રણ યુવકો ધોકા-પાઇપ લઈને તૂટી પડ્યા

ભરતસિંહ વાઢેર, વલસાડ: વાપીના ચલા વિસ્તારમાં જાહેરમાં એક યુવકને બેરહમીપૂર્વક માર મારવામાં આવતો હોવાનો એક વીડિયો સોશિયલ મીડિયામાં વાયરલ થઈ રહ્યો છે. વાયરલ થયેલા વીડિયોમાં કેટલાક શખ્સો એક યુવકને જાહેર રસ્તા પર જ લોખંડના પાઇપ વડે માર મારી રહ્યા છે. વીડિયો વાયરલ થતાં મામલો પોલીસ સ્ટેશન સુધી પહોંચ્યો છે. વાપી ટાઉન પોલીસે (Vapi town police) પણ આરોપીઓ સુધી પહોંચવા કાર્યવાહી હાથ ધરી છે.

બનાવની વિગત મુજબ વાપીના ચલા (Chala) વિસ્તારમાં જાહેર રસ્તા પર એક યુવકને ઢોર  માર મારવામાં આવ્યો હતો. આ બનાવનો વિડીયો અત્યારે સોશિયલ મીડિયામાં વાયરલ થઈ રહ્યો છે. જેમાં બે શખ્સો યુવકને રસ્તા પર સૂવડાવીને લોખંડના પાઇપ સહિતના હથિયારોથી ઢોર માર મારી રહ્યા હોવાના દ્રશ્યો જોવા મળી રહ્યા છે.

ઘટના બનીએ વખતે હાજર એક વ્યક્તિએ યુવકને માર મારવાના દ્રશ્યો મોબાઇલ કેમેરામા રેકોર્ડ કરી લીધા હતા. જે વીડિયો અત્યારે સોશિયલ મીડિયામાં વાયરલ થઇ રહ્યો છે. મળતી માહિતી મુજબ આ વીડિયોમાં ભોગ બનેલી વ્યક્તિ દમણના ડાભેલ વિસ્તારમાં રહેતો અજય પટેલ (Ajay Patel) હોવાનું જાણવા મળી રહ્યું છે.

અજય દમણથી વાપીના ચલા વિસ્તારમાં આવ્યો હતો. અહીં તે એક જગ્યાએ પાણી પીવા ઊભો હતો એ વખતે ત્રણ શખ્સો આવીને તેના પર બેરહમીમીપૂર્વક તૂટી પડ્યા હતા.

અજયને રસ્તા પર સૂવડાવીને ઢોર માર મારવામાં આવ્યો હતો. અજયને માથાના ભાગે લોખંડની પાઈપ વાગતાં તે બેભાન થઈ ગયો હતો. બનાવ અંગે વાપી ટાઉન પોલીસ સ્ટેશનમાં જાણ કરવામાં આવી છે. પોલીસે પણ આ મામલે તપાસ હાથ ધરી છે.

પ્રાથમિક તપાસમાં જાણવા મળ્યું છે કે અંગત અદાવતમાં દમણના ડાભેલ વિસ્તારમાં રહેતા અજય પટેલ પર વાપીના ચલામાં રહેતા પ્રાંજલ સીંગ, ભાનુ સીંગ અને આકાશ સીંગ નામના ત્રણ યુવકોએ અજય પર હુમલો કર્યો હતો. ત્રણેય યુવકના મિત્ર સાથે અજય પટેલની અગાઉ કોઈ બાબતે બબાલ થઇ હોવાથી જૂની અદાવત રાખી આ હુમલો કરાયો હતો. પોલીસે આ વીડિયોના આધારે આરોપીઓ સુધી પહોંચવા તપાસ તેજ કરી છે.