વલસાડઃ દીકરા સાથે જતી ગરીબ મહિલા પાસેથી પોલીસની ઓળખ આપી લૂંટારૂઓ 3 લાખ લઈને ફરાર

ભરતસિંહ વાઢેર, પારડીઃ વલસાડના પારડી ખડકી નજીક  નેશનલ હાઇવે પર પોલીસની ઓળખ આપી એક શ્રમજીવી માતા પુત્ર પાસેથી અંદાજે 3 લાખ રૂપિયા ની લૂંટ ચલાવી મોપેડ સવાર 3 શખ્સો ફરાર થઈ ગયા છે. વતનમાં દીકરીના લગ્ન પ્રસંગ માટે જઈ રહેલો શ્રમજીવી પરિવાર ઘરે પહોંચે એ પહેલાં જ લૂંટનો ભોગ બન્યો છે. બનાવની જાણ થતાં વલસાડ જિલ્લા પોલીસે લૂંટારૂ ટોળકીને પકડી પાડવા માટેની કાર્યવાહી હાથ ધરી છે.

બનાવની વિગત મુજબ વલસાડ ના પારડી તાલુકા ના ખડકી  નજીક નેશનલ હાઇવે નંબર 48 પર વાપીના બલિઠાથી બાઈક પર ડભોઇ જઈ રહેલા માતા-પુત્રને બ્રિજ પાસે બાઇક સવાર 3 શખ્સોએ અટકાવ્યા હતા. જે બાદ તેમને પોતે પોલીસ હોવાની ઓળખ આપીને લૂંટનો ભોગ બનેલા યુવક પાસે હેલમેટ અને લાયસન્સની માગણી કરવામાં આવી હતી. આ દરમિયાન એક શખ્સ યુવકના માતા જશીબેન વાડીના હાથમાં રહેલો થેલો ઝૂંટવી લીધો હતો.

જશીબેનના હાથમાંથી જે થેલો લઈ લેવામાં આવ્યો હતો તેમાં રોકડ રૂપિયા 3 લાખ હતા. પોલીસની ખોટી ઓળખ આપનારા શખ્સો લૂંટ ચલાવી ફરાર થઇ ગયા હતા. મહિલાએ જણાવ્યું કે તેઓને લાગ્યું કે તેમનું બાઈક જે શખ્સોએ રોક્યું છે તેઓ પોલીસ છે તો પછી તેમનો સામાન લઈને ભાગી થોડા જવાના છે. પરંતુ આરોપીઓ તેમની પાસેથી રૂપિયા મૂકેલો થેલો લઈને ફરાર થઈ ગયા હતા.

જશીબેન વાડી નામની મહિલા લગ્ન પ્રસંગ માટે વત્તન જઈ રહી હતી. જેને લઈને ડભોઇ ખાતે વાપી ના બલિઠાથી અન્ય મિત્રો સાથે બાઇક પર જવા માટે નીકળ્યા હતા જે દરમિયાન રેમન્ડ ફેકટરી નજીક આવેલ સુરત તરફ ના બ્રિજ પર આ માતા પુત્ર ને પાછળથી આવેલ લોકોએ પોલીસની ઓળખ આપી તેમને અટકાવ્યા હતા.

આ ઘટનાને પ્રત્યક્ષદર્શીએ જણાવ્યું કે, માતા-પુત્ર બાઈક પર જઈ રહ્યા હતા ત્યારે તેમની પાછળ આવેલા શખ્સોએ તેમને રોકીને પોલીસની ઓળખ આપી હતી. આ પછી અચાનક તેમાંથી એક શખ્સે મહિલા પાસેથી થેલો લઈ લીધો હતો અને તેમના બાઈકમાંથી ચાવી કાઢીને ફરાર થઈ ગયા હતા. જેથી કરીને લૂટારૂ ટોળકીનો પૂછો ના કરી શકાય.

મહિલાએ પોતાની વ્યથા જણાવતા કહ્યું કે તેમને એમ હતું કે આ તો પોલીસવાળા છે તેમનાથી અમારે ક્યાં ડરવાની જરુર છે. પરંતુ આ ગફલતમાં રહેલી મહિલા કશું સમજે તે પહેલા તેમના બાઈકની ચાવી અને રૂપિયા મૂકેલો થેલો લઈને આરોપીઓ ત્યાંથી ફરાર થઈ ગયા હતા.

પારડી પોલીસને આ અંગે વિગતો મળતા આરોપીઓને ઝડપી પાડવા માટે તજવીજ હાથ ધરી છે. આ સિવાય રૂપિયા લઈને નાસી ગયેલા લોકો કઈ ભાષામાં વાત કરતા અને તેમના દેખાવ તથા વાહનના નંબર સહિતની વિગતો મેળવીને વધુ તપાસ કરશે.