દિવાળીમાં ગુજરાતીઓનું મોસ્ટ ફેવરિટ બની રહ્યું છે દમણ, ભીડ ઉમટી

ભરતસિંહ વાઢેર, દમણ: ગુજરાતીઓ ફરવાના ખૂબ શોખીન છે અને નાની અમથી રજા મળે એટલે દીવ કે ગોવા ફરવા ઉપડી જતાં હોય છે. હવે દિવાળીના વેકેશનમાં ગુજરાતીઓ પરિવાર સાથે પ્રવાસ કરી રહ્યા છે. જોકે, આ આ વખતે ટ્રેન અને બસની મુશેક્લીઓના કારણે ગુજ્જુઓ ગોવાને બદલે દમણની વાટ પકડી છે. મીની ગોવા તરીકે જાણીતા દમણમાં હાલ પ્રવાસીઓ મોટી સંખ્યામાં ઉમટી પડયા છે. જેના કારણે 3 વર્ષથી ઠપ્પ પડેલા દમણ પ્રવાસન ઉદ્યોગને વેગ મળ્યો છે. આવો આપને પણ કરાવીએ દમણના આલ્હાદ્ક વાતાવરણ અને દરિયા કિનારાની શેર.

રાજ્યના પડોશમાં આવેલો નાનકડો સંઘપ્રદેશ દમણ પર્યટન માટે ખૂબ જ જાણીતું નામ છે. દરિયા કિનારે આવેલો હોવાથી આ નાનકડો સંઘપ્રદેશ પર્યટન માટે દેશભરમાં જાણીતો છે અને દેશભરના પર્યટકો  દમણની મુલાકાત લે છે. દમણના દરિયા કિનારાની સુંદરતા જોઈ અને દર વર્ષે પર્યટકોની સંખ્યામાં વધારો થતો રહે છે. આથી દમણ મીની ગોવા તરીકે પણ ઓળખાય છે. ગુજરાત અને મુંબઈના પ્રવાસીઓના મતે દમણમાં ગોવા કરતાં ઓછા ખર્ચે મજા માણી શકાય છે.

દમણમાં પર્યટકોને આકર્ષવા માટે દમણમાં દેવકા બીચ અને જમપોર બીચ સહિતના સ્થળો પર વોટર રાઇડની સાથે સુંદર અને સ્વચ્છ દરિયાકિનારો હોવાથી મોટી સંખ્યામાં પર્યટકો દમણના દરિયા કિનારે ફરવા આવે છે. સાથે જ પ્રદેશમાં દારૂની પણ છૂટ હોવાથી મોટી સંખ્યામાં શોખીનો દર વર્ષે દમણની મુલાકાત લે છે, ત્યારે દમણમાં દિવાળી વેકેશનમાં હાલ અમદાવાદ, વડોદરા, સુરત સહિત દક્ષિણ ગુજરાતમાંથી મોટી સંખ્યામાં પ્રવાસીઓ ઉમટયા છે.

કોરોનાકાળમાં સંઘ પ્રદેશ દમણના પર્યટન ઉદ્યોગને ખૂબ જ મોટો ફટકો પડયો હતો. કોરોનાને કારણે દમણના પર્યટન સ્થળો સૂમસામ ભાસી રહ્યા હતા. આથી મોટેભાગે પર્યટન પર જ નિર્ભર આ પ્રદેશ સાથે  હોટલ ઉદ્યોગ અને અન્ય સંબંધિત ઉદ્યોગ પણ મુશ્કેલીમાં હતો. જોકે, આ વખતે ફરી એક વખત મુશ્કેલી બાદ આ નાનકડા પર્યટન સ્થળની રોનક પરત ફરી રહી છે અને ફરી એક વખત દમણના દરિયા કિનારા પર્યટકોથી ઉભરાઈ રહ્યા છે. પર્યટકો ફરી દિવાળી વેકેશન નિમિત્તે આ સુંદર નાનકડા પ્રદેશની મુલાકાત લેવાની શરૂઆત થઇ છે. પ્રદેશના જામપોર અને દેવકા દરિયા કિનારે મોટી સંખ્યામાં પર્યટકો આવી રહ્યા છે અને વેકેશનના માહોલમાં ફરી વખત દમણની રોનક પરત ફરી રહી છે.

મહત્વપૂર્ણ છે કે, સંઘપ્રદેશ દમણ દરિયા કિનારે આવેલું છે અને દરિયાની સુંદરતાને કારણે દેશભરમાં જાણીતું છે. આથી ગુજરાત અને નજીકના રાજ્યના પર્યટકો દરિયાની મોજ માણવા માટે ગોવાની જગ્યાએ દમણને વધારે પસંદ કરે છે. આથી દમણના દરિયા કિનારે મીની ગોવા જેવો આભાસ કરાવે છે. છેલ્લા ત્રણ વર્ષથી જે રીતે પ્રદેશના દરિયા કિનારોનો ચોમેરથી વિકાસ થયો છે, તેને કારણે હવે દમણના દરિયા કિનારા વિદેશના દરિયા કિનારાને ટક્કર આપે તેવા સુંદર લાગી રહ્યા છે. આથી પર્યટકોની સંખ્યામાં પણ વધારો થઇ રહ્યો છે. ફરી એક વખત પ્રદેશ દમણના પર્યટન ઉદ્યોગની રોનક પરત ફરી છે. આથી ઉદ્યોગકારોની સાથે સ્થાનિક લોકોમાં પણ આશાનો નવો સંચાર થયો છે.