Daman Beach: દમણના દરિયા કિનારે જતા સહેલાણીઓ સાવધાન, એક ભૂલ અને થશે મોટું નુકસાન

ભરતસિંહ વાઢેર, દમણ: સંઘ પ્રદેશ દમણના દરિયા કિનારે નાહવા પર પ્રતિબંધ લાગ્યા બાદ વધુ એક કડક નિર્ણય લેવામાં આવ્યો છે. આ વખતે દમણ કલેકટર દ્વારા જાહેર કરેલા એક આદેશમાં દમણના દરિયા કિનારે નાહવા ઉપરાંત પાન મસાલા અને ગુટકા ખાવાની સાથે પ્લાસ્ટિકના વપરાશ પર પણ પ્રતિબંધ મૂકવામાં આવ્યો છે. મહત્વપૂર્ણ છે કે થોડા દિવસ અગાઉ પ્રશાસન દ્વારા દમણના દરિયા કિનારે પર્યટકોની સુરક્ષા માટે દરિયામાં નહાવા પર પ્રતિબંધ લગાવવામાં આવ્યો હતો. અને પર્યટકોને  દરિયામાં નહાતા રોકવા પોલીસ પહેરો પણ ગોઠવવામાં આવ્યો છે.

દમણના દરિયા કિનારે સ્વચ્છતા જળવાઈ રહે અને પર્યાવરણનું જતન થાય તે માટે હવેથી દમણના દરિયા કિનારા પર પાન મસાલા અને ગુટકા ખાવા પર પ્રતિબંધ લગાવવામાં આવ્યો છે. સાથે જ દરિયા કિનારે પ્લાસ્ટિકનાં વપરાશ પર પણ રોક લગાવવામાં આવી છે. અને આ આદેશના ભંગ બદલ રૂપિયા 1000 નો દંડ પણ ફટકારવામાં આવશે.

દમણના દરિયા કિનારે દર વર્ષે મોટી સંખ્યામાં દેશભરમાંથી પર્યટકો ઉમટે છે. આથી દરિયા કિનારે ભીડ જામે છે. સાથે જ ચોમાસા દરમિયાન દરિયો તોફાની રહેતો હોવાથી દરિયામાં નહાવું જોખમી સાબિત થઇ શકે છે. આથી પર્યટકોની સલામતી માટે પ્રશાસન દ્વારા દરિયામાં નહાવા પર રોક લગાવવામાં આવી છે. વધુમાં હવે દમણનો દરિયા કિનારો પણ સ્વચ્છ રહે તે માટે દરિયાકિનારે પાન મસાલા અને ગુટકા ખાવા પર પણ પ્રતિબંધ લગાવવામાં આવ્યો છે.

પર્યાવરણનું જતન થાય તે માટે દરિયાકિનારે પ્લાસ્ટિકનાં વપરાશ પર પણ રોક લગાવવામાં આવી છે. આ આદેશોનું પાલન કરવા માટેની જવાબદારી પોલીસ વિભાગની સાથે અનેક વિભાગોને સોંપવામાં આવી છે. આદેશના પાલન માટે ગ્રામ પંચાયત, જિલ્લા પંચાયત, એક્ષાઇઝ વિભાગને પણ સોંપવામાં આવી છે. આથી દમણના દરિયા કિનારે તૈનાત પોલીસકર્મીઓ પ્રશાસનના આદેશોનું કડકાઇથી પાલન થાય તે માટે સતત નજર રાખી રહ્યા છે.

જો હવે દમણના દરિયા કિનારે પાન મસાલા કે ગુટકા ખાતા પકડાશે તેમને એક હજાર રૂપિયાનો દંડ પણ ફટકારવામાં આવશે .આથી  હવે દમણના દરિયા કિનારે ફરવા જઈ રહ્યા છો તો દરિયા કિનારા પર પાન મસાલા અને ગુટકા ખાવા મોંઘા પડી  શકે છે.