ACB trap: વલસાડના અંભેટી પંચાયતનો લાંચિયો તલાટી ઝડપાયો, આ કામ માટે માંગી હતી રૂ.10,000ની વાત

ભરતસિંહ વાઢેર, વલસાડ: વલસાડ જિલ્લાના (Valsad) કપરાડા તાલુકામાં એસીબી (ACB) સપાટો બોલાવી અને કપરાડાના અંભેટી  ગ્રામ પંચાયતના (Ambheti gram panchayat) તલાટીને રૂ 10 હજારની લાંચ લેતાં રંગેહાથ ઝડપી પાડયો છે. એસીબીએ બોલાવેલા સપાટાને કારણે વલસાડ જિલ્લાના લાંચિયા બાબુઓમાં ફફડાટ વ્યાપી ગયો છે.

બનાવની વિગત મુજબ વલસાડ જિલ્લાના કપરાડા તાલુકાના અંભેટી ગામમાં ફરિયાદીની જમીન ખેતીલાયક જમીનને એન. એ  કરવા આ કામ માટે તલાટીના દાખલાની જરૂર હતી. આથી જમીન ને એન.એ  કરાવવા માટે તલાટી સ્નેહલ પટેલએ  દાખલાના બદલામાં ફરિયાદી પાસેથી કુલ 30 હજાર રૂપિયાની લાંચની માંગ કરી હતી.

જોકે અગાઉ ફરિયાદી પાસેથી આરોપી તલાટીએ લાંચના 30  હજારમાંથી 20 હજાર રૂપિયા લઇ લીધા હતા. અને બાકીના દસ હજાર રૂપિયા આપવા જણાવ્યું હતું.. આથી  ફરિયાદીએ એસીબીનો સંપર્ક કરતાં આ મામલે એસીબીએ આજે આ લાંચિયા તલાટીને રંગેહાથ ઝડપવા છટકાનું આયોજન કર્યું હતું.

જેમાં ગ્રામ પંચાયતના તલાટી સ્નેહલ  પટેલ ને  ફરિયાદી પાસેથી લાંચના રૂપિયા 10 હજાર રોકડા  સ્વીકારતા જ એસીબીએ દબોચી લીધો હતો .. અંભેટી  ગ્રામ પંચાયતનો તલાટી સ્નેહલ પટેલ  લાંચ લેતાં ઝડપાતા જિલ્લાના અન્ય લાંચિયા બાબુઓમાં  ફફડાટ વ્યાપી ગયો હતો.

ઉલ્લેખનીય છેકે એસીબીની ટ્રેપમાં છાસવારે લાંચિયા અધિકારીઓ ઝડપાતા હોવા છતાં પણ લાંચિયા બાબુઓ બાજ નથી આપતા અને પોતાની હરકતો ચાલુ રાખતા હોય છે. આવી પરિસ્થિતિ વચ્ચે વધુ એક લાંચિયો અધિકારી ઝડપાતા ફફડાટ ફેલાયો હતો.