ભરૂચ: લિફ્ટમાં બે બાળકો ફસાયા, 1 કલાકની જહેમત બાદ બહાર કઢાયા

ભરૂચનાં શાલીમાર કોમ્પલેક્ષનાં એક થિયેટરમાં જવા માટેની લિફ્ટમાં બે બાળકો ફસાઇ ગયા હતાં. જેના કારણે અફરાતફરીનો માહોલ સર્જાયો હતો. જોકે સ્થાનિક લોકો અને ફાયરબ્રિગેડની ટીમનાં કારણે આ બાળકોને એક કલાકની જહેમત બાદ બચાવી લેવામાં આવ્યાં છે. આ દુર્ઘટનાને કારણે બે બાળકો ઘણાં જ ગભરાઇ ગયા હતાં.

આ કિસ્સામાં ભરૂચનાં રહેવાસી ઓમ મોદી અને શ્રેયાંસી મોદી લિફ્ટમાં ફસાઇ ગયા હતાં. ઓમ મોદીએ આ અંગે જણાવતાં કહ્યું કે, ' અમે બંન્ને પિક્ચર જોવા જતા હતાં ત્યારે લિફ્ટ થોડી જ ઉપર ગઇ અને બંધ થઇ ગઇ. અમે ઘણી જ બૂમો પાડી પછી કોઇએ અમારો અવાજ સાંભળ્યો હતો. અંદર કોઇ પંખો કે કંઇ ન હતું જેના કારણે અમને શ્વાસ લેવામાં પણ તકલીફ થતી હતી. થોડીવારમાં બહારથી લોકો અમને લિફ્ટમાંથી બહાર કાઢવાનાં પ્રયત્નો શરૂ કર્યાં હતાં. અમે એમને પૂછ્યે કે કેટલી વાર થશે તો એક જ જવાબ આપે કે બે મિનિટમાં થઇ જશે. અમારી પાસે અંદર ફોન હતો એટલે મમ્મીને ફોન કર્યો. મમ્મી ત્યાં આવી પછી કામ બરાબર થયું. અમે અંદર એક કલાક સુધી રહ્યાં હતા.'

આ દુર્ઘટનાને કારણે આખા શાલીમાર કોમ્પલેક્ષમાં દોડાદોડી થઇ ગઇ હતી.

બાળકોનાં પરિવારજનોનાં જીવ તાળવે ચોંટી ગયા હતા આ બંન્ને બાળકો બહાર આવ્યાં બાદ જ એમને શાંતી થઇ.

થોડા દિવસ પહેલા જૂનાગઢની એક ખાનગી હોસ્પિટલમાં રાત્રે લીફટ અટકી જતાં દર્દી અને તેના સગા સંબંધીઓ સહિત 8 લોકો ફસાઈ ગયા હતાં. લિફ્ટને તોડીને તેમને બહાર કાઢવામાં આવ્યા હતા.