WhatsApp Status ને હવે યુઝર્સ પોતાના અવાજમાં મૂકી શકશે, કંપની લાવી રહી છે નવું ફિચર

મેટા-માલિકીનું ઇન્સ્ટન્ટ મેસેજિંગ પ્લેટફોર્મ WhatsApp એક નવી સુવિધા પર કામ કરી રહ્યું છે. અહેવાલો અનુસાર, કંપની ટૂંક સમયમાં યુઝર્સને સ્ટેટસ પર વૉઇસ નોટ્સ શેર કરવાની મંજૂરી આપી શકે છે. હાલમાં, યુઝર્સ તેમના વોટ્સએપ સ્ટેટસ પર માત્ર તસવીરો, ટેક્સ્ટ અને વીડિયો શેર કરી શકે છે. WaBetaInfoના એક રિપોર્ટ અનુસાર, કંપની હવે તમને તમારા સ્ટેટસ અપડેટ્સમાં વૉઇસ નોટ્સ શેર કરવાની મંજૂરી આપશે.

રિપોર્ટ અનુસાર, WhatsApp હાલમાં આ ફીચર પર કામ કરી રહ્યું છે. કંપની iOS યુઝર્સ માટે ફીચર પર કામ કરતી જોવા મળી છે. WABetaInfo એ ફીચરના ઈન્ટરફેસનો સ્ક્રીનશોટ પણ શેર કર્યો છે. તસવીર જોઈને એવું કહી શકાય કે વોટ્સએપ યુઝર્સ તેમના સ્ટેટસ પર 30 સેકન્ડ સુધીની વોઈસ નોટ્સ શેર કરી શકે છે.

જ્યારે યુઝર્સ આ સેક્શનમાં કોઈ ટેક્સ્ટ એન્ટર નહીં કરે, તો યુઝર્સને વોટ્સએપ ચેટની જેમ જ માઇક્રોફોન આઇકોન દેખાશે. વપરાશકર્તાઓ તેમના વૉઇસ સ્ટેટસ અપડેટને ફક્ત તે લોકો સાથે જ શેર કરી શકશે જેમની સાથે તેમણે સ્ટેટસ શેર કરવાનું પસંદ કર્યું છે. યુઝર્સ પ્રાઈવસીમાં જઈને એવા લોકોને પસંદ કરી શકે છે જેમને તેઓ તેમનું સ્ટેટસ બતાવવા માગે છે.

રિપોર્ટ જણાવે છે કે વોટ્સએપ સ્ટેટસ અપડેટ્સમાં શેર કરવામાં આવેલી વોઈસ નોટ્સ એન્ડ-ટુ-એન્ડ એન્ક્રિપ્ટેડ હશે. આગામી વોટ્સએપ ફીચર માત્ર iOS યુઝર્સ માટે જ નહીં પરંતુ એન્ડ્રોઈડ યુઝર્સ માટે પણ ઉપલબ્ધ હશે. સ્ટેટસ અપડેટ માટે વોઈસ નોટ શેર ફીચર ભવિષ્યના અપડેટ્સમાં ઉપલબ્ધ થશે.

દરમિયાન, WhatsApp કથિત રીતે સ્ક્રીન લૉક ફીચર પર કામ કરી રહ્યું છે જે જ્યારે પણ કોઈ પણ વપરાશકર્તા એપ્લિકેશન ખોલશે ત્યારે પાસવર્ડ માટે પૂછશે. આ WhatsAppને વધારાની સુરક્ષા પ્રદાન કરશે અને જ્યારે વપરાશકર્તાઓ તેમના ઉપકરણનો ઉપયોગ ન કરતા હોય ત્યારે તેને અનધિકૃત ઍક્સેસથી સુરક્ષિત કરશે. WaBetaInfo ના રિપોર્ટ અનુસાર, આ ફીચર હાલમાં ડેવલપમેન્ટમાં છે અને ભવિષ્યમાં કેટલાક બીટા ટેસ્ટર્સ માટે રિલીઝ થવાની અપેક્ષા છે.