સુરેન્દ્રનગર : પત્ની સાથે આડા સંબંધોની શંકામાં વેપારીની હત્યા, પતિએ ખેલ્યો ખૂની ખેલ

રાજુદાન ગઢવી, સુરેન્દ્રનગર : સુરેન્દ્રનગરમાં ગત 12 કલાકમાં હત્યાના 3 બનાવો બન્યા છે. જોરાવરનગરના કરિયાણાના વેપારી ભરત ચૌહાણની ચાર શખ્સોએ બોથડ પદાર્થોના ઘા ઝીંકી હત્યા નીપજાવી હતી. આ હત્યા કેસમાં હવે નવો વળાંક સામે આવ્યો છે. પોલીસે ઝડપી પાડેલા આરોપી મહેશે જણાવ્યું છે કે મૃતકના તેની પત્ની સાથે આડા સંબંધો હતા.

બનાવની વિગતો છે કે ગઈકાલે રાત્રે અવાવરૂ જગ્યાએ એક વ્યક્તિની લાશ મળી આવી હતી. પોલીસે તપાસ કરતા આ લાશ ભરત ચૌહાણની ઓળખ થઈ હતી. પોલીસને જાણવા મળ્યું કે આ મામલે આરોપીને મહેશ ઉર્ફે મન્યો પટેલની પત્ની સાથે આડા સંબંધોની શંકા હતી.

આ મામલે ડીવાયએસપી દોશીએ જણાવ્યું કે આરોપી મહેશને શંકા હતી કે તેની પત્ની સાથે મૃતકના શંકાસ્પદ સંબંધો છે. જેથી તેણે ગઈકાલે મૃતકને લઈ જઈ અને લાકડી અને ધોકાથી માર મારી અને સીમ વિસ્તારમાં તેમની લાશ ફેંકી દીધી હતી. આ મામલે મૃતકના પત્નીએ ફરિયાદ આપી છે.

જોકે, આરોપી મહેશની ભૂમિકા શંકાસ્પદ હોવાના અહેવાલ છે. મહેશ મૃતકને પત્ની સાથેના સંબંધો મામલે બ્લેકમેલ કરતો હોવાની પણ આશંકા છે. આ મામલે પોલીસની તપાસમાં મોટું કૌભાંડ બહાર આવે તેવી શક્યતાઓ જોવાઈ રહી છે. જોકે, આ તમામ ઘટનાક્રમમાં એક વેપારીનો જીવ ગયો છે.

હકિતતમાં હજુ તો ગઈકાલે જ પત્ની સાથે ચાલી રહેલા ઘરકંકસામાં સુરેન્દ્રનગરના સરોડી ગામના જમાઈ હિતેશ કોરડીયાએ છ મહિનાથી રિસામણે ગયેલી પત્નીના પિયરમાં પહોંચી જઈને ખૂની ખેલ ખેલ્યો હતો. જમાઈએ આ ઘટનામાં હાથમાં છરી લઈને ધસી આવી અને સાસરિયાઓ પર આડેધડ હુમલો કર્યો હતો. આ હિચકારા હુમલામાં સાળીનું ઘટનાસ્થળે અને સસરાનું સારવાર દરમિયાન મોત થયું હતું.