Crime News: સુરેન્દ્રનગરમાં પડોશી યુવકના ત્રાસના કારણે યુવતીએ જીવન ટૂંકાવ્યું, લગ્ન માટે કરતો હતો દબાણ

અક્ષય જોષી, સુરેન્દ્રનગરઃ સુરેન્દ્રનગર (Surendranagar) દૂધરેજ ફાટક બહારના વિસ્તારમાં રહેતી યુવતી તેના પડોશી યુવકની (Neighborhood youth) હેરાનગતીથી કંટાળી તેમજ યુવકે યુવતી સાથેના ફોટો તેમજ વીડિયો ઇન્સ્ટાગ્રામમાં (Instagram video) મુકતા યુવતીને લાગી આવતા ઝેરી દવા પી લેતા સારવાર દરમિયાન મોત થયું હતુ. આ મામલે એ ડિવિઝન પોલીસ મથકે (A Division Police Station) ફરિયાદ નોંધાતા પોલીસે ગણતરીના કલાકોમાં આરોપીની ધરપકડ (Accused) કરી જેલ હવાલે કરી દીધો છે.

આજના સોશિયલ મીડિયાના યુગમાં યુવાનો અને યુવતીઓ ફોટો અને વીડિયો મુકતા હોય છે ત્યારે એક વીડિયો કે ફોટો એક યુવતીના મોતનું કારણ બન્યું હોય તેવો કિસ્સો સુરેન્દ્રનગર શહેરમાં બન્યો છે. સુરેન્દ્રનગર દૂધરેજ ફાટક બહારના વિસ્તારમાં રહેતી છાયા નામની યુવતીની તેની પડોશમાં રહેતા ભરત ત્રિભુવનભાઇ ગોરૈયા સાથે સગાઇની વાત ચાલતી હતી.

પરંતુ કોઇ કારણસર ભરતના લગ્ન બીજી યુવતી સાથે થઇ ગયા હતા. બે વર્ષમાં ભરતે તે યુવતી સાથે છુટાછેડા લઇ લીધા હતા. ત્યાર બાદ ભરત છાયાને તેની સાથે લગ્ન કરવા દબાણ કરતો હતો. અને અવારનવાર છાયા કોઇ ચીજવસ્તુઓ લેવા માટે બહાર જાય તો તેનો પીછો કરી પરેશાન કરતો હતો. છાયા તેની આ પજવણીથી કંટાળી ગઇ હતી.

તેમ છતાં ભરત તેનો પીછો છોડતો ન હતો અને છેલ્લે તો છરી બતાવી ધમકી પણ આપતો હતો કે મારી સાથે લગ્ન નહીં કરે તો જાનથી મારી નાંખીશ તેવો પણ પરિવારજનો આક્ષેપ કરી રહ્યાં છે. તેમ છતાં યુવતી તાબે ન થયાં ભરતે છાયા સાથે અગાઉના ફોટો અને વીડિયો ઇન્સ્ટાગ્રામમાં મુકતા છાયાને લાગી આવતા ઝેરી દવા ગટગટાવી લીધી હતી.

આ અંગે પરિવારજનો ને જાણ થતાં છાયાને તાત્કાલિક હોસ્પિટલ લઇ જવામાં આવી હતી પંરતુ સારવાર દરમિયાન તેનુ મોત થતાં પોલીસે છાયાના નિવેદનના  આધારે મરવા માટે દુષ્પ્રેરણા આપવા અંગેનો ગુનો નોંધી ગણતરીના કલાકોમાં આરોપી ભરતને ઝડપી લઇ જેલાન સળીયા પાછળ ધકેલી દીધો છે. ત્યારે આજના સોશિયલ મીડિયાના યુગમાં દરરોજ ફોટો અને વીડિયોની ભરમાર કરતા યુવાનો અને યુવતીઓ માટે આ કિસ્સો લાલબત્તી સમાન બન્યો છે.

તેમજ આ બનાવ બાદ સુરેન્દ્રનગર જિલ્લા પોલીસ તંત્ર દ્વારા પણ ખાસ મહિલાઓ અનર યુવતીઓને અપિલ કરવામાં આવી છે કે આ પ્રકારે ફોટો કે વીડિયોના આધારે કોઇ વ્યક્તિ બ્લેકમેઇલ કરવાનો પ્રયાસ કરે તો તાત્કાલિક પોલીસને જાણ કરવામાં આવે પોલીસ દ્વારા ભોગ બનનારની ઓળખ પણ ગુપ્ત રાખવાની ખાત્રી આપવામાં આવી છે.