ચોટીલાના MLAનો વીડિયો વાયરલ: ડાકલાના તાલે હાથમાં સાંકળ સાથે ધૂણ્યા

સુરેન્દ્રનગર: હાલ કોરોના કાળ ચાલી રહ્યો છે ત્યારે સરકારની અનેક વિનંતીઓ છતાં લોકો સોશિયલ ડિસ્ટન્સિંગ (Social distancing)નું પાલન કરતા નથી. દરરોજ આવા અનેક વીડિયો (Viral video) સામે આવી રહ્યા છે. દુઃખદ વાત તો એ છે કે કોરોનાના નિયમોનો ભંગ થતા હોય તેવા કાર્યક્રમોમાં ખુદ નેતાઓ પણ હાજર રહે છે. ચોટીલાના કૉંગ્રેસના ધારાસભ્ય ઋત્વિક મકવાણાનો એક વીડિયો વહેતો થયો છે. જેમાં તેઓ હાથમાં સાંકળ લઈને ધૂણી રહ્યા છે. આ દરમિયાન અહીં કોરોનાની માર્ગદર્શિકાની બિલકુલ પાલન કરવામાં આવ્યું ન હતું.

કુભારા ગામનો વીડિયો: મળતી માહિતી પ્રમાણે ધારાસભ્યએ કુભારા ગામની મુલાકાત લીધી હતી. અહીં યોજાયેલા એક માતાજીના પ્રસંગમાં તેઓ હાથમાં સાંકળ લઈને ધૂણતા નજરે પડ્યા હતા. વાયરલ થયેલા વીડિયોમાં ધારાસભ્ય ડાકલાના તાલે ધૂણતા નજરે પડે છે. આ કાર્યક્રમમાં સોશિયલ ડિસ્ટન્સિંગનું પાલન થતું જોવા મળ્યું ન હતું. એટલું જ નહીં, અહીં કોઈએ માસ્ક પણ પહેર્યું ન હતું.

આ મામલે જ્યારે ન્યૂઝ18 ગુજરાતીએ ધારાસભ્ય ઋત્વિક મકવાણાને સવાલ કર્યો ત્યારે તેઓ લાજવાને બદલે ગાજ્યા હતા. તેમણે જણાવ્યું હતું કે, ભાજપના નેતાઓ પણ કાર્યક્રમો કરો છે તેમને સવાલ પૂછો.

માહિતી મળી છે કે ઋત્વિક મકવાણાએ કુભારા ગામે માતાજીના માંડવામાં મહેમાનગતી માણી હતી. આ દરમિયાન અન્ય ભુવાઓની સાથે સાથે તેઓ પણ હાથમાં સાંકળ લઈને ધૂણી રહ્યા હતા. ચોટીલાના ધારાસભ્ય માતાજીમાં ખૂબ જ શ્રદ્ધા ધરાવતા હોવાથી તેઓ હાથમાં સાંકળ રાખીને રમતા જોવા મળ્યા હતા.

ઉલ્લેખનીય છે કે લીંબડીના પૂર્વ ઘારાસભ્ય સોમાભાઈ પટેલ પણ માતાજીના માંડવામાં હાથમાં સાંકળ લઈને ધૂણતા હોય તેવા વીડિયો ભૂતકાળમાં વાયરલ થયા હતા. જોકે, આ જે તે વ્યક્તિની શ્રદ્ધાનો વિષય છે પરંતુ હાલ કોરોના કાળ ચાલી રહ્યો છે ત્યારે સોશિયલ ડિસ્ટન્સિંગ અને માસ્કના નિયમોનું પાલન થાય તે ખૂબ જરૂરી છે.