સુરેન્દ્રનગર: લીંબડીમાં વકીલ પર તીક્ષ્ણ હથિયારથી હુમલો, હુમલાખોર ભરચક બજારમાંથી ભાગી ગયો

રાજુદાન ગઢવી, સુરેન્દ્રનગર: સુરેન્દ્રનગર જિલ્લા (Surendranagar district)ના લીંબડી શહેરમાં એક વકીલ (Lawyer) પર ધોળા દિવસે હુમલો (Attack) થયાનો બનાવ સામે આવ્યો છે. વકીલ પર તીક્ષ્ણ હથિયારથી હુમલો કરવામાં આવ્યો હતો. હુમલા બાદ વકીલને સારવાર માટે હૉસ્પિટલ (Hospital)માં ખસેડવામાં આવ્યા છે. જે હથિયારથી હુમલો કરવામાં આવ્યો હતો તે ઘટના સ્થળેથી મળી આવ્યું છે. હુમલાના સમાચાર સાંભળીને આસપાસના લોકો એકઠા થઈ ગયા હતા. પોલીસને જાણ કરવામાં આવતા પોલીસ પણ બનાવ સ્થળે દોડી આવી હતી. વકીલ બી.જે. પટેલ પર જીવલેણ હુમલો થયો છે.

મળતી માહિતી પ્રમાણે બાર એસોસિએશનના પૂર્વ પ્રમુખ બી.જે.પટેલ પર જીવલેણ હુમલો થયો છે. વકીલ પોતાની ઓફિસમાં હાજર હતા ત્યારે યુવક ઓફિસ ખાતે ધસી આવ્યો હતો. મહિના પહેલા છેડતી અને મટનની દુકાન બંધ કરાવવા બાબતે યુવકને વકીલ સાથે બોલાચાલી થઈ હતી. 

આ હુમલા પાછળ અંગત અદાવત જવાબદાર હોવાનું જાણવા મળ્યું છે. એવી માહિતી મળી છે કે વકીલને હુલાખોર સાથે  મહિના પહેલા હિન્દુ વિસ્તારમાં માસ-મટનની દુકાન બંધ કરાવવા બાબતે બોલાચાલી થઈ હતી. હુમલાખોરનું નામ સુફિયાન ઘાંચી હોવાનું સામે આવ્યું છે.  બનાવ બાદ સિવિલ હૉસ્પિટલ પરિસરમાં વકીલો અને વેપારીઓના ટોળે ટોળા એકઠા થયા હતા.

વકીલ જ્યારે પોતાની ઓફિસમાં હાજર હતા ત્યારે યુવક છરી સાથે ધસી આવ્યો હતો અને વકીલ પર મસાલો ઉડાવ્યો હતો. યુવકના આવા કૃત્યથી વકીલ પોતાની આંખો ચોળવા લાગ્યા હતા. આ દરમિયાન યુવકે વકીલને પોતાની પાસે રહેલી છરી હુલાવી દીધી હતી.

હુમલા બાદ યુવક ભરચક બજારમાંથી નાસી ગયો હતો. બી.જે. પટેલના બીજા વકીલ મિત્રો પણ હુમલા વખતે ઓફિસમાં હાજર હતા. જે બાદમાં તેમણે વકીલને તાત્કાલિક લીંબડીની જ હૉસ્પિટલમાં સારવાર માટે ખસેડ્યા હતા.

યુવકે જે રીતે હુમલો કર્યો છે તેના પરથી આ પૂર્વઆયોજિત કાવતરું હોવાનું લાગી રહ્યું છે. હુમલા બાદ પોલીસે યુવકની શોધખોળ આદરી છે.

સારવાર લઈ રહેલા વકીલે જણાવ્યું હતું કે, મહિના પહેલાનાબનાવનો ખાર રાખીને આજે યુવક મારી ઓફિસમાં ધસી આવ્યો હતો. જ્યાં મસાલો છાંટ્યા બાદ મારા જમણી બાજુના પડઘામાં છરીનો ઘા મારી દીધો હતો. જે બાદ તે ભાગી ગયો હતો. હું તેને પકડવા માટે પાછળ દોડ્યો હતો. જે બાદમાં હું બજારમં ઢળી પડ્યો હતો.