સુરેન્દ્રનગરમાં બોરવેલમાં પડી ગયેલા અઢી વર્ષના શિવમને આર્મી જવાનોએ હેમખેમ બહાર કાઢ્યો, જુઓ દિલધડક ઓપરેશનની તસવીરો

સુરેન્દ્રનગર: ભારતીય સેના (Indian army)ને એવું કામ કરી બતાવ્યું છે, જેનાથી જવાનોને સલામ કરવાનું મન થાય. આ દિલધડક ઓપરેશનનો વીડિયો જોઈને તમારી છાતી ગજગજ ફૂલશે. હકીકતમાં સુરેન્દ્રનગર જિલ્લાના ધ્રાંગધ્રા તાલુકાના દુદાપુર ગામ (Dudapur village)ની સીમમાં આવેલી એક વાડીમાં મંગળવારે સાંજના સાત વાગ્યાની આસપાસ અઢી વર્ષનો શિવમ (Shivam) રમતાં રમતાં 300 ફૂટથી વધુ ઊંડા બોરમાં પડી ગયો હતો.

આ અંગેની જાણ ધ્રાંગધ્રા ખાતેના આર્મી યુનિટને કરવામાં આવી હતી. આર્મીના જવાનોએ 40 મિનિટ સુધી ઓપરેશન હાથ ધરીને શિવમને હેમખેમ બહાર કાઢ્યો હતો. સાંજના સમયે શિવમની માતા રસોઇ બનાવી રહ્યા હતા અને પિતા ખેતરમાં મજૂરી કરી રહ્યા હતા. આ દરમિયાન બાળક રમતાં રમતાં ખુલ્લા બોરમાં પડી ગયો હતો.

બાળક બોરવેલમાં પડી જવાની જાણ થતાં જ પરિવારે દોડાદોડી કરી હતી. જે બાદમાં તંત્રને જાણ કરવામાં આવી હતી. આ જ કડીમાં આર્મીને પણ બચાવ કામગીરી માટે જાણ કરવામાં આવી હતી.

મળતી માહિતી પ્રમાણે શિવમ બોરવેલમાં આશરે 20 ફૂટ નીચે ફસાયો હતો. માતાપિતાના બચાવવાના પ્રયાસો નિષ્ફળ ગયા હતા બાદ વાડી માલિક અને ગામ લોકોને જાણ કરવામાં આવી હતી. બાદમાં ફાયરબ્રિગેડ, પ્રાંત અધિકારી, મામલતદાર, પોલીસ, આર્મી અને એનડીઆરએફને જાણ કરવામાં આવી હતી.

બાદમાં તંત્ર દ્વારા ધ્રાંગધ્રા આર્મીની મદદ લેવામાં આવી હતી. ધ્રાંગધ્રા આર્મીની ટીમે 40 મિનિટમાં જ બાળકને હેમખેમ બહાર કાઢ્યો હતો. જે બાદમાં બાળકને સારવાર માટે હૉસ્પિટલ લઈ જવામાં આવ્યો હતો.

શિવમ અંદાજે 7 વાગ્યા આસપાસ બોરમાં પડી ગયો હતો. આશરે 10.30 વાગ્યાની આસપાસ આર્મીના જવાનોએ દિલધડક રેસ્ક્યૂ ઓપરેશન કરીને બાળકને બહાર કાઢ્યો હતો.

રેસ્ક્યૂ બાદ શિવમને પ્રાથમિક સારવાર આપવામાં આવી હતી. જે બાદમાં તેને સુરેન્દ્રનગર રિફર કરાયો હતો.

શિવમ હેમખેમ બહાર આવતા તમામ લોકોએ સેનાના કાર્યની બિરદાવી હતી.