ગુજરાતની બે યુવતીઓએ ઈતિહાસ રચ્યો, માઉન્ટ એવરેસ્ટ સર કરી પરત ફરી

કિર્તેશ પટેલ, સુરત : ગુજરાતના સુરતની રહેવાસી આ બે યુવતીઓ માઉન્ટ એવરેસ્ટ સર કરી પોતાના વતન પાછી ફરી છે. ગુજરાતનું ગૌરવ વધારનાર આ બે બહેનોનું તેમના ફેમિલી અને મિત્રો વર્તુળે એરપોર્ટ પર જ ભવ્ય સ્વાગત કર્યું છે.

પ્રાપ્ત માહિતી અનુસાર, સુરતની અઠવાલાઇન્સ આદર્શ સોસાયટીમાં રહેતા અને જાણીતા આયુર્વેદ તબીબ ડો. આનંદ વૈદ્યની બે દીકરીઓ ૨૫ વર્ષીય અદિતિ અને ૨૧ વર્ષીય અનુજાએ ૨૨મીએ વહેલી સવારે માઉન્ટ એવરેસ્ટની ટોચ પર પહોંચીને દેશનો ત્રિરંગો લહેરાવ્યો હતો. જેઓ આજે સુરત એરપોર્ટ પર પરત આવી પહોંચતા તેમના પરિવાર અને મિત્રોએ ભવ્ય સ્વાગત કર્યું છે.

સુરતની આ બે બહેનોએ સુરત અને ગુજરાતનું નામ વિશ્વમાં રોશન કર્યું છે. આ બે યુવતીઓના સાહસને કારણે એક સાથે બે ગુજરાતી દીકરીઓએ એવરેસ્ટ સર કરી અનોખી સિદ્ધી હાંસલ કરી છે.

અદિતિ અને અનુજા વૈદ્યએ ૩૦ માર્ચના રોજ એવરેસ્ટ બેઝકેમ્પ પરથી પર્વતારોહણની શરૂઆત કરી હતી. હિમાલય પર સતત બદલાતા વાતાવરણ અને માઇનસ ૪૦ ડિગ્રી તાપમાનના પડકાર વચ્ચે બન્ને બહેનોએ સતત ઝઝુમવાની સાથે ૨૨ મેના રોજ એવરેસ્ટ સર કર્યું હતું.

૩૦ માર્ચે એવરેસ્ટ સર કરવા ગયેલી ટીમમાં સુરતની અદિતિ અને અનુજા સાથે વિશ્વના અન્ય દેશોના ૧૪ સાહસિકો અને ૨૫ શેરપા પણ હતા. તેમની સાથે ૨૫ શેરપાઓની ટીમ હતી. આ તમામ દ્વારા એવરેસ્ટ પર સફળ આરોહણ કરાયું છે

ઉલ્લેખનીય છે કે, ૧૯૫૩ની સાલમાં એડમન્ડ હિલેરી અને શેરપા તેન્સિંગે પ્રથમવાર ૨૯ હજાર ફૂટની ઊંચાઇએ આવેલા માઉન્ટ એવરેસ્ટને સર કર્યું હતું. ત્યાર બાદ ૧૯૮૪માં બચેન્દ્રી પાલ પહેલા ભારતીય મહિલા બન્યા હતા. જોકે, હમણાં સુધી ગુજરાતમાંથી એકેય મહિલાએ આ ગૌરવ મેળવ્યું ન હતું. આ સાથે જ સુરતની આ બે દીકરીઓએ ગુજરાતનું નામ રોશન કર્યું છે.