Gujarat Forecast: હજુ 4 દિવસ મેઘરાજા ગુજરાતને ધમરોળશે, હવામાન વિભાગે 2 દિવસનું રેડ એલર્ટ આપ્યું

તોફાની પૂર વચ્ચે આ આગાહી દક્ષિણ ગુજરાત માટે ચિંતા સમાન છે. તો સૌરાષ્ટ્રની હાલત પણ આગામી દિવસોમાં મેઘરાજા બગાડી શકે છે. જે રીતે છેલ્લા 4 દિવસમાં મેઘરાજાએ તાંડવ મચાવ્યું છે જેના કારણે રાજ્યમાં સામાન્ય કરતાં 65 ટકા વધુ વરસાદ વરસ્યો છે. સૌરાષ્ટ્ર-કચ્છમાં સામાન્ય કરતાં 94 ટકા વધુ વરસાદ વરસ્યો છે. તો દક્ષિણ ગુજરાત સહિત અન્ય ભાગોમાં 46 ટકા વધુ વરસાદ વરસ્યો છે. હજુ પણ ચાર દિવસ રાજ્યમાં વરસાદનું જોર યથાવત રહેશે. બે દિવસ બાદ દરિયો પણ તોફાની બનવાની સંભાવના છે. 5 દિવસ માછીમારોને દરિયો ન ખેડવા સૂચના અપાઈ છે.

હવામાન વિભાગના ડાયરેક્ટર ડૉ.મનોરમા મોહંતીના જણાવ્યું અનુસાર, ગુજરાત પર જળતાંડવ હજુ પણ અટકવાનું નામ નથી લઈ રહ્યું. હવામાન વિભાગના દાવા પ્રમાણે હજુ 4 દિવસ મેઘરાજા ગુજરાતને ધમરોળશે. જેમાંથી સૌરાષ્ટ્ર-કચ્છ પણ નહીં બચી શકે.

હજુ દક્ષિણ ગુજરાતમાં ખતરો ટળ્યો નથી ત્યાં સૌરાષ્ટ્ર પર આફતના વાદળો ઘેરાયા છે. હવામાન વિભાગની આગાહી પ્રમાણે બુધવાર અને ગુરૂવારે સૌરાષ્ટ્રમાં વરસાદનું જોર વધશે. જૂનાગઢ અને ગીર સોમનાથમાં સતત 2 દિવસ રેડ એલર્ટ અપાયું છે. એટલે કે 8-8 ઈંચથી પણ વધુ વરસાદ ખાબકી શકે છે.

આ તરફ પૂરથી પ્રભાવિત દક્ષિણ ગુજરાતમાં નવસારી, વલસાડ અને ડાંગમાં બુધવારે પણ 8-8 ઈંચથી વધુ વરસાદની સંભાવના છે. ગુરૂવારે પણ આ ત્રણેય જિલ્લામાં ઓરેન્જ એલર્ટ છે. એટકે કે ચારથી લઈને 8 ઈંચ સુધી વરસાદની સંભાવના છે.

સૌરાષ્ટ્રના અમરેલીમાં બુધવારે ઓરેન્જ અને ગુરૂવારે રેડ એલર્ટ છે... ભાવનગરમાં બુધવારે ઓરેન્જ એલર્ટ છે.. તો રાજકોટ, બોટાદ, ભાવનગર અને પોરબંદરમાં ગુરૂવારે ઓરેન્જ એલર્ટ છે.