સુરત : મામુલી રકમની લેતીદેતીમાં થઈ હતી કરપીણ હત્યા, પોલીસે પિન્ટુ મર્ડર કેસનો ભેદ ઉકેલ્યો

કિર્તેશ પટેલ, સુરત : શહેરના પાંડેસરા વિસ્તારમાં નવરાત્રીના પ્રથમ નોરતે જ બનેલી હત્યાની ઘટનામાં પોલીસે બે આરોપીની ધરપકડ કરી છે. 15 હજારની લેતીદેતીમાં પાંડેસરા વિસ્તારમાં માથા ભારે ઈસમની છાપ ધરાવતા પિન્ટુ નામના એક યુવાનની જાહેરમાં બે સગા ભાઈઓ દ્વારા રહેંસી નાખી કરપીણ હત્યા કરવામાં આવી હતી. જેમાં પોલીસે હત્યા કરનાર બે ભાઈઓની ધરપકડ કરી કાયદેસરની કાર્યવાહી હાથ ધરી છે.

સુરતમાં જાણે ગુનાખોરી એ માજા મૂકી હોય તેવું લાગી રહ્યું છે કારણકે દરોજ સવાર પડતાની સાથે સુરતમાં હત્યા કે હત્યના પ્રયાસની ઘટના પોલીસ ચોપડે નોંધાતી હોય છે. જેમાં પણ અસામાજિક તત્વો કે માથાભારે તત્વો અંગત અદાવતમાં ખૂની ખેલ ખેલતા હોય છે ત્યારે ગઈકાલે પણ આવી એક ઘટના બનતા ચકચાર મચી જવા પામી હતી.

સુરતના પાંડેસરા વિસ્તારમાં આવેલ સીતાનગર ખાતે રહેતા અને પોતાના વિસ્તારમાં માથા ભારે ઈસમની છાપ ધરાવતા આ ઈસમ પર ધોળેદિવસે તેના ઘર નજીક બે યુવાનો દ્વારા ચપ્પુ જેવા ઘાતક હથિયારો સાથે ધસી આવીને તેના પર ઉપરાછાપરી ઘા મારીને તેની કરપીણ હત્યા કરી ત્યાંથી ભાગી છૂટ્યાં હતા.

જોકે મરનાર ઈસમ આ વિસ્તારમાં ભારે ખોફ સાથે લોકો અને પોલીસ ના માથાનો દુખાવો બન્યો હતો, ઘટનાની જણકારી મળતા પાંડેસરા પોલીસ તાત્કાલિક બનાવ વાળી જગ્યા પર દોડી આવી હતી.  પોલીસે આ મામલે હત્યાનો ગુનો નોંધી આરોપીઓને પકડી પાડવા અલગ લાગે ટીમો બનાવી તપાસનો ધમધમાટ શરુ કર્યો હતો.

જેમાં પોલીસે આરોપી બે ભાઈઓની ધરપકડ કરી છે. રોશન અને તેનાં ભાઈએ 15 હજાર રૂપિયાની લેતીદેતીમાં આ માથાભારે ઈસમને મોતને ઘાટ ઉતાર્યો હતો. જો કે આરોપી રોશન પણ ગુનાહિત ઈતિહાસ ધરાવે છે. હાલ પોલીસે બંનેની ધરપકડ કરી કાયદેસરની કાર્યવાહી હાથ ધરી છે.