સુરત: દારૂની હેરાફેરી માટે બુટલેગરોએ અપનાવો નવો કીમિયો, પોલીસ પણ વિચારમાં પડી ગઈ!

કિર્તેશ પટેલ, સુરત: સુરત શહેરના વરાછા વિસ્તાર (Varachha)માં પોલીસ પેટ્રોલિંગ દરમિયાન બે આરોપીને વરાછા પોલીસે (Varachha Police) દારૂના જથ્થા સાથે ઝડપી પાડ્યા હતા. પોલીસે બંનેની પૂછપરછ કરતા બંને બાઇકમાં ચોરખાના બનાવીને દારૂની હેરાફેરી કરતા હોવાનું માલુમ પડ્યું છે. પોલીસે આરોપીની બાઇકના ચોરખાનામાં રાખેલા દારૂ સહિતનો મુદ્દામાલ જપ્ત કર્યો છે. પોલીસ બંને આરોપીની ધરપકડ કરીને હાલ તેમની વિરુદ્ધ કાયદેસરની કાર્યવાહી શરૂ કરી છે.

આમ તો ગુજરાતમાં દારૂબંધ છે પરંતુ અહીં દરરોજ દારૂનો જથ્થો મળી આવવાના બનાવો પોલીસ ચોપડે નોંધાતા રહે છે. સુરત શહેરના લગભગ દરેક વિસ્તારમાં દારૂનું દૂષણ જોવા મળી રહ્યું છે. પોલીસ તરફથી પણ બુટલેગરો વિરુદ્ધ કાર્યવાહી કરવામાં આવી રહી છે.

હાલમાં વિજિલન્સના વડા તરીકે નિર્લિપ્ત રાય (Nirlipt Rai) આવતા શહેરમાં દારૂબંધી જેવો માહોલ સર્જાયો છે, જેને લઈને બુટલેગરો અવનવી તરકીબ અજમાવી દારૂનું વેચાણ કરી રહ્યા છે. આવા જ બે બુટલેગરોને વરાછા પોલીસે પકડી પાડ્યા હતા.

સુરતના વરાછા વિસ્તારમાં આવેલ સંતોષીનગર સોસાયટી પાસે જાહેર રોડ પરથી બે ઈસમો પસાર થઈ રહ્યા છે, જે હકીકત મળતા વરાછા પોલીસે વોચ ગોઠવી હતી અને બંને આરોપીઓ આવતાની સાથે તેમને ઝડપી લેવામાં આવ્યા હતા. બંનેને પોલીસ મથકે લાવીને તપાસ કરતા આરોપી દીપક રાજારામ તિવારી અને શુભમ લાલજી તિવારી પાસેથી થેલામાં મૂકેલો દારૂનો જથ્થો મળી આવ્યો હતો.

પોલીસને ચોક્કસ બાતમી મળી હતી કે બુટલેગરો કોઈ અન્ય રીતે દારૂ લઈને આવી રહ્યા છે. જે બાબતે આરોપીની પૂછપરછ કરતા તેઓએ જણાવ્યુ હતુ કે, આરોપી પોતાની બાઇકની સીટની નીચે અને પેટ્રોલ ટાંકીમાં અલગ રીતે પેટી બનાવીને દારૂનો જથ્થો લાવતા હતા.

દારૂની હેરાફેરી માટેની તરકીબ જાણીને પોલીસને પણ નવાઈ લાગી હતી. વરાછા પોલીસે હાલ આવા તત્વો સામે કાર્યવાહી બંને બુટલેગરોની ધરપકડ કરી આગળની કાર્યવાહી હાથ ધરી છે. આ કેસમાં પોલીસે દારૂનો જથ્થો મોકલનાર આરોપી મનીષ મારવાડીને વોન્ટેડ જાહેર કર્યો છે.