Surat News: સુરતમાં સ્ટાર ગાર્ડનના રહીશો બિલ્ડરના પોકળ દાવામાં ફસાયા, હવે મૂકાયા મોટી મુશ્કેલીમાં

સુરતના છાપરાભાઠા રોડ ખાતે આવેલા સ્ટારગાર્ડનના રહીશોએ આજરોજ બિલ્ડરનો વિરોધ કર્યો હતો. બિલ્ડર દ્વારા આજીવન મેન્ટેનન્સ ઉઘરાવી સુવિધા નહીં આપી ઠગાઈ આચરી હોવના સ્થાનિક રહીશોએ આક્ષેપ કર્યા હતા.

સુરતમાં સેવન સ્ટાર ગ્રુપ દ્વારા બનાવાયેલા બિલ્ડીંગ અવાર અવાર વિવાદમા આવે છે. બિલ્ડીંગમાં પ્રાથમિક સુવિધા નહીં આપી હોવાની સુરતમાં સેવન સ્ટાર દ્વારા બનાવાયેલ બિલ્ડીંગની અનેક ફરિયાદ ઉઠી રહી છે. તેવામાં સુરતના છાપરાભાઠા રોડ પર આવેલા સ્ટાર ગાર્ડન  રેસિડેન્સીમાં પણ આવો જ બિલ્ડરોનો છબરડો બહાર આવ્યો છે.

આજીવન મેઇન્ટનેન્સ ઉઘરાવી બિલ્ડરો દ્વારા મેઇન્ટનેન્સ નહીં ભરી રહીશો સાથે છેતરપિંડી કરી હોય તેવી ફરિયાદ ઉઠી છે. સ્ટાર ગાર્ડન રેસિડેન્સીમાં  ફ્લેટ વહેંચાય ત્યારે અલગ અલગ સાઈઝના હિસાબે આજીવન મેઇન્ટેનન્સ ઉઘરાવવામાં આવ્યું હતું. જોકે બિલ્ડરો દ્વારા મેઇન્ટેનન્સના રૂપિયા નહીં ભરતા સ્થાનિકોએ વેઠવાનો વારો આવ્યો છે.

રેસિડેન્સીમાં લાઈટ બિલ બાકી હોવાથી જીઈબી દ્વારા વીજ જોડાણ કાપી નખવાના આવ્યું હતું. વીજ કનેક્શન કાપી નખાતા સ્થાનિકોએ વગર વીજળીએ રહેવાનો વારો આવ્યો હતો.

400 જેટલા ફ્લેટ આ સ્ટાર ગાર્ડન રેસિડેન્સીમાં આવેલા છે ત્યારે બિલ્ડર દ્વારા મીઠા પાણીની વ્યવસ્થાનું પણ વચન આપવામાં આવ્યું હતું. જે પણ પોકળ સાબિત થયું છે. વીજ જોડાણ કપાઈ જતા લિફ્ટ, પાણી જેવી અનેક સમસ્યાનો સામનો રહીશો કરી રહ્યા છે. અંતે બિલ્ડરને રજુઆત કરતા તેમણે હાથ અધ્ધર કરી દીધા હતા. અને રહીશોએ જાતે ઘર દીઠ રૂપિયા ઉઘરાવી વીજ બિલ ભર્યા હતા.

આમ સેવન સ્ટાર બિલ્ડર દ્વારા સ્ટાર ગાર્ડનના રહીશોને છેતરવામાં આવ્યા હોવાના આક્ષેપ સ્થાનિકો દ્વારા કરાયા હતા. વધેલા રહીશો દ્વારા આજ રોજ વિરોધ નોંધાવવામાં આવ્યો હતો અને જો તંત્ર બિલ્ડર વિરૂદ્ધ ફરિયા નહીં સાંભળે તો આગામી દિવસમાં ઉગ્ર આંદોલનની ચિમકી ઉચ્ચારી હતી.