સુરતઃ બાળકોના અભ્યાસ માટે વાલીઓ લડી લેવાના મૂડમાં, DEO કચેરીએ પહોંચી કરી રજૂઆત

પ્રજ્ઞેશ વ્યાસ, સુરતઃ વેસુ વિસ્તારમાં આવેલી એલ.પી. સવાણી સ્કૂલમાં (L.P. Savani school) ઓનલાઈન ક્લાસ (Online class) બંધ કરી દેવામાં આવ્યાં છે. વાલીઓ દ્વારા ફી (school fee) ન ભરવામાં આવી હોવાનું કહીને ક્લાસ બંધ કરી દેવામાં આવ્યાં છે. ત્યારે વાલીઓએ સ્કૂલ પ્રશાસનને રજૂઆત કર્યા બાદ કોઈ નિરાકરણ ન આવતાં DEO કચેરીએ પહોંચી રજૂઆત કરી છે. કોરોના વાયરસના (coronavirus) કારણે અત્યારે સ્કૂલ કોલેજો અને શૈક્ષણિક સંસ્થાઓ બંધ છે.

ડીઈઓ કચેરી ખાતે વાલીઓ દ્વારા બેનર લઇને વિરોધ કરાયો હતો અને તેમના બાળકોના ઓનલાઇન ક્લાસ ફરી ચાલુ થાય તે માટેની માંગણી કરી હતી .  વાલીઓએ આક્ષેપ કરતાં જણાવ્યું છે કે, હાલ કોરોના સમયમાં માત્ર ટ્યુશન ફી લેવાવી જોઈએ. અન્ય એક્ટિવિટી ફી ન લેવામાં આવે તેવી રજૂઆત કરવામાં આવી છે.

એક વિદ્યાર્થીના વાલી એવા ધ્વની બહેને જણાવ્યું કે, એલ.પી.સવાણી સ્કૂલ વેસુમાં વિદ્યાર્થીઓના ઓનલાઈન ક્લાસ બંધ કરી દેવામાં આવ્યાં છે. વાલીઓએ ફીની ક્યારેય ના પાડી નથી.

પરંતુ હાલ કોરોના સમયમાં શાળા બંધ છે ત્યારે હાઈકોર્ટનાઆદેશ મુજબ માત્ર ટ્યુશન ફી લેવી જોઈએ. જેના બદલે એક્ટિવિટી જેવા કે યોગ, ડાન્સ સહિતની ફી માટે પણ કહેવામાં આવે છે. જે યોગ્ય નથી એટલે અમે આ મામલે અમારો વિરોધ કરી ઓનલાઈન શિક્ષણ શરૂ કરવાની માંગ કરી રહ્યા છીએ.

ફીનું દબાણ અને ઓનલાઈન શિક્ષણ બંધ થવા અંગે વાલીઓએ ડીઈઓ કચેરી પહોંચીને વિરોધ પ્રદર્શન કરવાની સાથે સાથે રજૂઆત કરી હતી કે વહેલી તકે ઓનલાઈન શિક્ષણ શરૂ કરવામાં આવે. આ અંગે વાલીઓને સાંભળીને તેમની રજૂઆત પર કામ કરવાની ડીઈઓ કચેરી દ્વારા ધરપત આપવામાં આવી છે.