Surat news: ફાયર અધિકારી NOC રિન્યૂ કરવા લાંચ લેતા ઝડપાયો, વચેટિયાની પણ ધરપકડ

સુરતઃ સુરતમાં (surat) કોમર્શીયલ બિલ્ડીગનું ફાયર NOC રિન્યુ માટે 30 હજારની લાંચ લેતા મોટા વરાછા ફાયર સ્ટેશનનાં (varachha fire station) ફાયરના અધિકારી અને વચેટિયાને એસીબીની ટીમે (ACB trap) ઝડપી પાડ્યો હતો. સુરત મનપાના (SMC) ફાયર વિભાગ દ્વારા ફાયર સેફટીની એનઓસી નહી ધરાવનાર સંસ્થાઓ સામે કડકાઇ પુર્વક પગલા ભરવામાં આવે છે. આ આકરી કાર્યવાહી વચ્ચે ફાયર વિભાગના કર્મચારીઓએ એનઓસીના નામે લોકો પાસેથી રૂપિયા ખંખેરવાનો રસ્તો શોધી લીધો છે.

વરાછા વિસ્તારમાં રહેતા એક વ્યક્તિ કોમર્શીયલ બિલ્ડીગના ફાયર એનઓસી માટે મનપાના વરાછા ફાયર સ્ટેશનમાં અરજી કરી હતી. ફાયર સ્ટેશનના ફાયર ઓફીસર બેંચર કરમણ સોંલકીએ ઝડપથી એન.ઓ.સી કાઢી આપવા માટે અરજદાર પાસે 30 હજાર રૂપિયાની માંગણી કરી હતી.

આ સાથે બેંચર સોંલકીએ તેના સાથીદાર સચિન અરજણ ગોહીલ સાથે અરજદારની મુલાકાત કરાવી લાંચના રૂપિયા સચિનને આપવા જણાવ્યું હતું. ત્યારબાદ સચિને અરજદારને બે ત્રણ વખત ફોન કરી લાંચના રૂપિયાની માંગણી કરી હતી. ફાયર ઓફીસરના દબાણને કારણે અરજદારે એસીબી પોલીસનો સંપર્ક કરી તમામ માહીતી જણાવી હતી.

દરમિયાન પોલીસે છટકું ગોઠવી ફાયર ઓફીસર સોંલકીને લાંચના રૂપિયા લેવા માટે મોટા વરાછા વિસ્તારમાં તુલસી આર્કેડ પાસે આવેલી ખોડલ ચા પાસે બોલાવ્યો હતો. પરંતુ ફાયર ઓફીસર સોંલકી નહીં આવીને તેના સાથીદાર સચિનને રૂપિયા લેવા મોકલ્યો હતો. જેને પોલીસે રંગેહાથે ઝડપી લીધો હતો.

આકરી પુછપરછમાં સચિન સોંલકીના કહેવાથી રૂપિયા લેવા આવ્યો હોવાનું કબૂલ કરી હતી. ફાયર ઓફિસર બેચર સોલંકી 80 હજાર નો પગારદાર હોવા છતાં એનઓસી રિન્યુ માટે લાંચ લેતો હતો. એનઓસી રિન્યુ માટે ફાયર એન્ડ સેફટી વિભાગમાં અરજી કરવામાં આવે એટલે ફાયર ઓફિસર સોલંકી વચેટીયા સચીન ગોહિલ ની અરજદાર સાથે ઓળખાણ કરાવતો હતો અને પછી એન.ઓ.સી રિન્યુ માટે વચેટીયો રકમ નક્કી કરતો હતો.