સુરતમાં રોજ 100 ફૂટ ઊંચે ફરકશે રાષ્ટ્રધ્વજ, લોકોમાં ગર્વની લાગણી

26મી જાન્યુઆરી એટલે પ્રજાસત્તાક દિન પૂર્વ સુરત રેલવે સ્ટેશનના પરિસરમાં 100 ફૂટ ઊંચે રાષ્ટ્રધ્વજ લહેરાવવામાં આવ્યો છે. જે આજથી હંમેશા માટે ફરકતો રહેશે. વડોદરામાં પણ આવો ઊંચો રાષ્ટ્રધ્વજ ફરકાવવામાં આવે છે.

સુરત રેલવે સ્ટેશન પરિસરમાં આજે, શુક્રવારે સાંસદ દર્શના જરદોશના હસ્તે 100 ફૂટ ઊંચાઈએ રાષ્ટ્રધ્વજ ફરકાવવામાં આવ્યો છે. સુરત આરપીએફ જવાનો પૈકી એક જવાન 24 કલાક રાષ્ટ્રધ્વજની દેખરેખમાં પણ રાખવામાં આવશે.

100 ફૂટ ઊંચો તિરંગો ફરકતો જોઇને લોકોએ ભારત માતા કી જય અને વંદેમાતરમનાં નારા લગાવ્યાં હતાં.

રેલવે મંત્રાલય દ્વારા તમામ એ-1 રેલવે સ્ટેશન પર 100 ફૂટ ઊંચો રાષ્ટ્રધ્વજ લહેરાવવાના આદેશ આપી દેવામાં આવ્યા હતા. જે બાદ આજે સુરત રેલવે સ્ટેશન પર આ તિરંગો લહેરાવવામાં આવ્યો હતો.સુરત સ્ટેશન પર રેલવે સ્ટાફની હાજરીમાં તિરંગો ફરકાવાતા ઉપસ્થિત લોકોએ પણ ગર્વની લાગણી અનુભવી હતી અને તિરંગા સાથે સેલ્ફી પણ લીધી હતી.

રેલવે સ્ટેશન પર મુસાફરો આ અંગે જણાવ્યું હતું કે, એક ભારતીય તરીકે આપણા માટે ગર્વની વાત છે. સુરત રેલવે સ્ટેશન પર 100 ફૂટ ઊંચો રાષ્ટ્રધ્વજ લહેરાતો જોવો એ ગર્વની વાત છે.