આ ભારતીય ક્રિકેટરે કરી સગાઈ, રોકા સેરેમનીની તસવીર શેર કરી આપી જાણકારી

નવી દિલ્હી : ટીમ ઇન્ડિયાના સ્ટાર સ્પિનર અને સૌથી મજાકીયા સ્વભાવવાળા યુજવેન્દ્ર ચહલ (Yuzvendra Chahal)ની સગાઈ નક્કી થઈ ચૂકી છે. ચહલે સોશિયલ મીડિયા પર રોકા સેરેમનીની તસવીર શેર કરીને આ જાણકારી આપી છે. ચહલે કહ્યું કે અમે લોકોએ હા કહ્યું. આ ખુશખબરીને શેર કર્યા પછી કેએલ રાહુલ અને હાર્દિક પંડ્યાએ અભિનંદન પાઠવ્યા છે.

ચહલ આઈપીએલમાં વિરાટ કોહલીની ટીમ રોયલ ચેલેન્જર્સ બેંગલોરનો મહત્વનો સભ્ય છે. થોડા દિવસો પછી તે આઈપીએલ માટે યૂએઈ રવાના થઈ જશે અને ઘણા સમય પછી તે ઘરે પરત ફરી શકશે. આવા સમયે ચહલે પોતાના પ્રશંસકોને ખુશખબરી આપી છે.

આઈપીએલનું આયોજન 19 સપ્ટેમ્બરથી 10 નવેમ્બર સુધી યૂએઈમાં કરવામાં આવશે. આ સાથે જ ભારતીય ક્રિકેટર્સ પણ લાંબા સમય પછી મેદાન પર પરત ફરશે.

યુજવેન્દ્ર ચહલની ફિયાન્સી ધનશ્રી વર્મા (Dhanashree Verma)કોરિયોગ્રાફર અને યુટ્યૂબર છે. ચહલની જેમ તે પણ સોશિયલ મીડિયામાં છવાયેલી રહે છે.

કોરોનાના કારણે ભારતીય ક્રિકેટર્સ ઘરમાં જ કેદ છે. આ દરમિયાન ચહલ સોશિયલ મીડિયા પર છવાયેલો રહ્યો હતો. ચહલના ટિકટોક વીડિયોએ પણ ઘણી ધૂમ મચાવી હતી.