#YEARENDER2018 : ફેડરરનો રેકોર્ડ અને જોકોવિચની વાપસીના નામે રહ્યું આ વર્ષ

ટેનિસમાં 2018નું વર્ષ બે દિગ્ગજ ખેલાડી રોજર ફેડરર અને નોવાક જોકોવિચના નામે રહ્યું હતું. આ વર્ષે રોજર ફેડરર ફરી નંબર વન ખેલાડી બન્યો હતો. ફેબ્રુઆરીમાં રોટરડમ ઓપનની ક્વાર્ટર ફાઇનલમાં સ્વિટ્ઝર્લેન્ડનો ફેડરર હોલેન્ડના રોબિન હાસને 4-6, 6-1,6-1થી હરાવી ચોથી વખત વર્લ્ડ નંબર વન બન્યો હતો. આ પહેલા તે ફેબ્રુઆરી 2004, જુલાઈ 2009 અને જુલાઈ 2012માં પણ નંબર વન ખેલાડી બન્યો હતો.

20 વખતના ગ્રાન્ડસ્લેમ વિજેતા ફેડરર આ જીત સાથે સૌથી મોટી ઉંમરમાં નંબર વન બનવાનો રેકોર્ડ બનાવ્યો હતો. ફેડરરે આંન્દ્રે અગાસીનો રેકોર્ડ તોડ્યો હતો.

ફેડરર આ પહેલા 2012માં નંબર વન પર હતો. આ પછી તે 5 વર્ષ 106 દિવસ પછી ફરીથી નંબર વન બન્યો હતો જે એક રેકોર્ડ છે. આમ તેણે નંબર વન વચ્ચે સૌથી વધારે અંતરનો રેકોર્ડ બનાવ્યો હતો. આ પહેલા અગાસી 1996 પછી 1999માં 3 વર્ષ 142 દિવસ પછી નંબર વન ખેલાડી બન્યો હતો.

આ વર્ષમાં વિમ્બલડનમાં ચેમ્પિયન બન્યા પછી સર્બિયાના નોવાક જોકોવિચે વર્ષનું ચોથું અને અંતિમ ગ્રાન્ડસ્લેમ યૂએસ ઓપન પણ પોતાના નામે કર્યું હતું. આ સાથે તે સૌથી વધારે ગ્રાન્ડસ્લેમ જીતવાના મામલે ત્રીજા નંબરે આવી ગયો હતો.

નોવાકની જીત અન્ય એક કારણથી પણ ખાસ હતી. આ જીત સાથે જોકોવિચે અમેરિકાના પૂર્વ મહાન ખેલાડી પીટ સામ્પ્રસના ગ્રાન્ડસ્લેમની બરાબરી કરી હતી. જેમણે 14 ગ્રાન્ડસ્લેમ જીત્યા હતા. હવે રોજર ફેડરર (20 ગ્રાન્ડસ્લેમ) અને રાફેલ નાદાલ (17) પછી જોકોવિચ અને સામ્પ્રસ 14-14 ગ્રાન્ડસ્લેમ સાથે બરાબરી પર છે.