#YEARENDER 2018: ડાંગની સરિતા સહિત આ 6 દીકરીઓએ ભારતને અપાવ્યું ગૌરવ

પીવી સિંધૂ માટે આ વર્ષ ખાસ રહ્યું હતું. તે ભલે ઘણી ટૂર્નામેન્ટની ફાઇનલમાં પહોંચીને જીત ન મેળવી શકી હોય પણ વર્ષના અંતમાં તેની ઐતિહાસિક જીતે બધી હાર ભુલાવી દીધી હતી. સિંધૂ બીડબલ્યુએફ ફાઇનલ્સનું ટાઇટલ મેળવનાર ભારતની પ્રથમ ખેલાડી બની હતી. આ સિવાય બેડમિન્ટનમાં એશિયન ગેમ્સમાં પણ મેડલ જીતનાર પ્રથમ ભારતીય બની હતી.

પાંચ વખતની વર્લ્ડ ચેમ્પિયન મેરિકોમે આ વર્ષે વધુ એક જીત સાથે બધા રેકોર્ડ તોડીને પોતાનો દબદબો યથાવત્ રાખ્યો હતો. મેરિકોમે દિલ્હીમાં રેકોર્ડ છઠ્ઠી વખત વર્લ્ડ ચેમ્પિયનશિપનું ટાઇટલ જીત્યું હતું. 35 વર્ષની ઉંમરમાં તેની આ જીતથી લોકો આશ્ચર્ય સાથે ગર્વ કરી રહ્યા છે.

ભારત માટે આ વર્ષે ટેબલ ટેનિસમાં એક નવું નામ સામે આવ્યું હતું. આ નામ એટલે મોનિકા બત્રા. દિલ્હીઆ પેડલરે આ વર્ષે દેશને મેડલ અપાવીને પોતાનું નામ બનાવ્યું હતું. 22 વર્ષની મોનિકાએ કોમનવેલ્થમાં ચાર ગોલ્ડ મેડલ જીત્યા પછીએશિયન ગેમ્સમાં ઐતિહાસિક બ્રોન્ઝ મેડલ દેશને અપાવ્યો હતો.

એશિયન ગેમ્સમાં ભારતની મહિલાઓની ટીમે 4x400 મી. રિલે દોડમાં ગોલ્ડ જીત્યો હતો. આ ટીમમાં ગુજરાતના ડાંગ જિલ્લાની સરિતા ગાયકવાડ પણ હતી. સરિતા ઉપરાંત તેની ટીમમાં હિમા દાસ, પૂવમ્મા રાજુ અને વિસમાયા વેલુવાકોરોથ પણ હતી. ભારતીય મહિલાઓની ટીમે 3 મિનિટ 28.72 સેકન્ડમાં 4x400મી.ની રિલે દોડ પૂરી કરીને પ્રથમ નંબર મેળવ્યો હતો. આ સાથે જ તેમણે ગોલ્ડ પોતાને નામ કર્યો હતો.

ભારતની હિમા દાસે આ વર્ષે પોતાને એથ્લેટ તરીકે સાબિત કરી હતી. અસમના એક નાના ગામમાંથી આવતી હિમાએ ટ્રેક ઇવેન્ટમાં દેશને ગૌરવ અપાવ્યું હતું. એશિયન ગેમ્સમાં 400 મીટરમાં તેણે ઐતિહાસિક મેડલ જીત્યો હતો. આ વર્ષે તેને અર્જુન એવોર્ડથી સન્માનિત કરવામાં આવી હતી.

સ્વપના બર્મને કોમનવેલ્થ ગેમ્સમાં હેપથલોનમાં દેશને ગોલ્ડ અપાવીને ઇતિહાસ રચ્યો હતો. આમ કરનારી તે પ્રથમ ભારતીય બની હતી. આ રેસમાં તેણે 6026 પોઇન્ટ મેળવ્યા હતા. છ હજાર પોઇન્ટ મેળવનાર તે પાંચમી મહિલા અથ્લેટ હતી.