IND vs WI: સચિનનો એક મોટો રેકોર્ડ તોડી શકે છે વિરાટ કોહલી

ટીમ ઇન્ડિયા ટેસ્ટ શ્રેણીમાં વેસ્ટ ઇન્ડીઝનો વ્હાઇટવોશ કર્યા પછી પાંચ મેચની વન-ડે શ્રેણીની તૈયારીમાં લાગી ગઈ છે. વન-ડે શ્રેણી દરમિયાન સુકાની વિરાટ કોહલી એક ખાસ રેકોર્ડ બનાવી શકે છે.

કોહલી વેસ્ટ ઇન્ડીઝ સામે વન-ડે ક્રિકેટમાં સૌથી વધારે રન બનાવનાર બેટ્સમેન બની શકે છે. વિન્ડીઝ સામે કોહલીએ અત્યાર સુધી 27 વન-ડેમાં 60.30ની એવરેજથી 1387 રન બનાવ્યા છે. જેમાં 4 સદી અને 9 અડધી સદીનો સમાવેશ થાય છે. સચિનને પાછળ રાખવા માટે વિરાટને 186 રનની જરૂર છે. જ્યારે 221 રન બનાવતાની સાથે જ વિરાટ વન-ડેમાં 10, 000 રન પુરા કરશે.

વન-ડે ક્રિકેટમાં વેસ્ટ ઇન્ડીઝ સામે સૌથી વધારે રન બનાવવાનો રેકોર્ડ સચિન તેંડુલકરના નામે છે. સચિને 39 વન-ડેમાં 52.73ની એવરેજથી 1573 રન બનાવ્યા છે. આ દરમિયાન 4 સદી અને 11 અડધી સદી ફટકારી છે.

વેસ્ટ ઇન્ડીઝ સામે વન-ડે ક્રિકેટમાં રન બનાવવાના મામલે રાહુલ દ્રવિડ ત્રીજો સૌથી સફળ ભારતીય ખેલાડી છે. દ્રવિડે 40 મેચમાં 42.12ની એવરેજથી 1348 રન બનાવ્યા છે. જેમાં 3 સદી અને 8 અડધી સદી સામેલ છે.

સૌરવ ગાંગુલી વેસ્ટ ઇન્ડીઝ સામે રન બનાવવાના મામલે ચોથા નંબરે છે. ગાંગુલીએ 27 મેચમાં 47.58ની એવરેજથી 1142 રન બનાવ્યા છે. તેણે 11 અડધી સદી ફટકારી છે.