IPL Auction 2022 : આ ગુજરાતી પ્લેયરને ક્રિકેટ માટે અમેરિકાનું ડ્રિમ છોડ્યું, RCBએ 10.75 કરોડમાં ખરિદ્યો

હર્ષલ પટેલની બેઝ પ્રાઇઝ બે કરોડ રૂપિયા હતી અને તેમની હરાજી શરૂ થતાની સાથે જ બોલી આઠ કરોડ રૂપિયા સુધી પહોંચી હતી. અંતે હર્ષલ પટેલ પર અંતિમ બોલી આરસીબીએ લગાવી હતી. હર્ષલ પટેલે ગત વર્ષે આઈપીએલમાં સૌથી વધુ 32 વિકેટ લઈને આઈપીએલના રેકૉર્ડની સરસાઈ કરી હતી. આ પર્ફૉર્મેન્સ બાદ તેમને 31 વર્ષની ઉંમરે ભારતીય ક્રિકેટ ટીમમાં સામેલ થવા માટે દાવેદાર માનવામાં આવી રહ્યા હતા.

હર્ષલ પટેલને આરસીબીએ 10.75 કરોડ રૂપિયામાં ખરીદ્યા હતા- હર્ષલની ખાસિયત એ છે કે તે બૉલિંગમાં લય પકડી લે તો ઘાતક બની જાય છે. સ્વિંગ પર આધાર રાખતા આ બૉલરે તેની ફર્સ્ટ ક્લાસ કારકિર્દીમાં 226માંથી અડધોઅડધ એટલે કે 123 વિકેટ કૅચઆઉટ દ્વારા અને 67 વિકેટ હરીફ બૅટ્સમૅનને બૉલ્ડ કરીને લીધી છે.

આઈપીએલની પ્રથમ દિવસની હરાજીમાં હર્ષલ પટેલ આરસીબીએ ખરીદેલા ખેલાડીઓમાં શ્રીલંકાનો વાનિન્ડુ હસરંગા સાથે સૌથી વધુ મોંઘો ખેલાડી બન્યો. હર્ષલ પટેલ અમદાવાદનાં દરિયાપુર વિસ્તારનો રહેવાસી. અમદાવાદમાં દરિયાપુર વિસ્તાર એટલે એક જમાનામાં તોફાની વિસ્તારની છાપ ધરાવે. એવો પણ સમય હતો જ્યારે શહેરમાં કંઈક પણ નાનું-મોટું છમકલું થાય એટલે સૌપ્રથમ કર્ફ્યુ જાહેર થાય, તો તેમાં ખાડિયા અને દરિયાપુરનાં નામ હોય.

અમદાવાદમાં રહેતા હર્ષલે તેનું ક્રિકેટનું સપનું પૂર્ણ કરવા માટે, 'અમેરિકન ડ્રીમ્સ'ને તિલાંજલિ આપી દીધી હતી. ભારતીય ક્રિકેટમાં છેલ્લા કેટલાંક સમયથી આ નામ ચર્ચામાં આવ્યું છે. ચાહે તે આઈપીએલ (ઇન્ડિયન પ્રિમિયર લીગ) હોય કે ઇન્ટરનેશનલ ક્રિકેટ હોય. તેઓ ભારતીય ક્રિકેટ ટીમમાં સામેલ પણ થયા અને નવેમ્બર 2021 માં ન્યૂઝીલૅન્ડ સામે ટી-20 મૅચમાં પ્લેયર ઑફ ધ મૅચ બન્યા હતા. ન્યૂઝીલૅન્ડ સામે ભારતીય ટીમ માટે રમેલી બે ટી-20 મૅચમાં તેમણે 7.28ની સરેરાશ પર ચાર વિકેટ લીધી હતી.

સ્ટાર સ્પોર્ટ્સ મુજબ 2018માં હર્ષલ પટેલને દિલ્હી કૅપિટલ્સ દ્વારા 20 લાખ રૂપિયાના બેઝ પ્રાઇઝ પર ખરીદવામાં આવ્યા હતા. આઈપીએલ 2021 સીઝનમાં તેમને રૉયલ ચૅલેન્જર્સ બૅંગલુરુને ટ્રેડ કરવામાં આવ્યા હતા.

1990માં જન્મેલા હર્ષલ પટેલ બાળપણથી જ અમદાવાદમાં સ્થાનિક ક્રિકેટ રમ્યો અને ત્યાર બાદ ગુજરાતની ટીમ માટે અંડર-15થી અંડર-19માં રમ્યો. તે ભારતની અંડર-19 ટીમ સાથે સાઉથ આફ્રિકા, ન્યૂઝીલૅન્ડ અને કેન્યાનો પ્રવાસ ખેડી ચૂક્યા હતા. હર્ષલ પટેલ નવેમ્બર 2021 માં ન્યૂઝીલૅન્ડ સામે ટી-20 મૅચમાં પ્લેયર ઑફ ધ મૅચ બન્યા હતા.

ભારતની ટી20 ક્રિકેટ ટીમમાં હર્ષલની પસંદગી થઈ, ત્યારે એક વાતચીતમાં તેમણે સ્વીકાર્યું હતું, "હા, સાચી વાત છે. માત્ર ક્રિકેટ માટે જ અમેરિકાની ચમકદમક જતી કરી હતી અને મારા પરિવારે આ નિર્ણયમાં મને સાથ આપ્યો હતો. હું અમદાવાદમાં એકલો જ રહેતો હતો અને ક્રિકેટ પર ફોકસ કરતો હતો."

2011 સુધી ગુજરાત માટે જુનિયર ક્રિકેટમાં રમ્યા બાદ હર્ષલનું ભાવિ પલટાયું- જેમણે પરિવાર સાથે અમેરિકા જવાનું ટાળ્યું હતું, તેણે અચાનક જ નિર્ણય લીધો અને વતન ગુજરાત છોડીને હરિયાણા માટે રમવાનું પસંદ કર્યું. 2011માં તે હરિયાણા માટે રમવા ગયો. હર્ષલે એક ઇન્ટરવ્યૂમાં કહ્યું હતું કે, એ સમયે સંજોગો એવા હતા કે મને લાગ્યું કે ટીમ બદલવાથી કદાચ સિનિયર ક્રિકેટમાં ઝડપથી સ્થાન મળી જશે. અને, એમ જ બન્યું. નવેમ્બર 2011માં તે હરિયાણા વતી દિલ્હી સામે રણજી ટ્રૉફી રમ્યા. એ જ સીઝનમાં કર્ણાટક સામેની બેંગલુરુ ખાતેની મૅચ હર્ષલની કારકિર્દીની ટર્નિંગ પૉઇન્ટ બની ગઈ, કેમ કે પહેલા જ દિવસે તેણે આઠ વિકેટ ખેરવીને કર્ણાટકને માત્ર 151 રનમાં આઉટ કરી દીધું.

હરિયાણાની ટીમ કર્ણાટકને તેના જ ગઢ એવા એમ. ચિન્નાસ્વામી સ્ટેડિયમમાં 151 રનમાં આઉટ કરે અને એક નવોદિત ગુજરાતી બૉલર આઠ વિકેટ ખેરવી જાય તેની કદાચ એ દિવસે પેવેલિયનમાં બેસીને મૅચ નિહાળનારા રાહુલ દ્રવિડ કે અનીલ કુંબલેને કલ્પના નહીં હોય. હરિયાણાએ એ મૅચ જીતી લીધી હતી.