ટીમ ઇન્ડિયાના સ્ટાર પ્લેયર યુવરાજ સિંહે નિવૃત્તિની જાહેરાત કરી દીધી છે. 19 વર્ષથી દેશ માટે શાનદાર ઇનિંગ્સ રમનાર યુવરાજે ફેરવેલ મેચ રમ્યા વગર ક્રિકેટમાંથી નિવૃત્તિ લઈ લીધી છે. ભારતનો સ્ટાર પ્લેયર ફેરવેલ મેચ વગર નિવૃત થઈ રહ્યો હોય તેવો પહેલા બનાવ નથી. પહેલા પણ ઘણા સ્ટાર ખેલાડીઓ મેદાન ઉપર ફેરવેલ મેચ રમ્યા વગર નિવૃત્ત થયા છે.
ઝહિર ખાન - ટીમ ઇન્ડિયાના સૌથી શાનદાર ફાસ્ટ બોલરમાંથી એક ઝહિર ખાને 15 ઓક્ટોબર 2015ના રોજ ટ્વિટ કરીને નિવૃત્તિની જાહેરાત કરી દીધી હતી. ઝહિર ખાને ભારત તરફથી 200 મેચમાં 282 વિકેટ ઝડપી છે.
વીવીએસ લક્ષ્મણ - ટેસ્ટમાં ટીમ ઇન્ડિયાનો તારણહાર રહેલ વીવીએસ લક્ષ્મણે પણ મેદાન બહાર જ ક્રિકેટને અલવિદા કહ્યું હતું. 2002માં ન્યૂઝીલેન્ડના પ્રવાસમાં તેની પસંદગી થઈ હતી પણ તેણે રમવાની ના પાડી દીધી હતી. લક્ષ્મણે ભારત તરફથી 86 વન-ડેમાં 2338 રન બનાવ્યા છે. જ્યારે 134 ટેસ્ટમાં 8781 રન બનાવ્યા છે.
વીરેન્દ્ર સેહવાગ - ટીમ ઇન્ડિયાના આક્રમક ઓપનર સેહવાગે પોતાના 37માં જન્મ દિવસે નિવૃત્તિની જાહેરાત કરી દીધી હતી. 2011ના વર્લ્ડ કપમાં ટીમને દરેક મેચમાં શાનદાર શરુઆત અપાવનાર સેહવાગે ઝહિર ખાનની નિવૃત્તિના પાંચ દિવસ પછી એટલે કે 20 ઓક્ટોબર 2015ના રોજ નિવૃત્તિની જાહેરાત કરી હતી. સહેવાગે 251 વન-ડેમાં 8273 રન બનાવ્યા છે.
ગૌતમ ગંભીર - 2011ના વર્લ્ડ કપની ફાઇનલમાં 97 રનની દમદાર ઇનિંગ્સ રમનાર ગંભીરે પણ મેદાનની બહાર ક્રિકેટમાંથી નિવૃત્તિ લીધી હતી. તેણે 4 ડિસેમ્બર 2018ના રોજ ટ્વિટર ઉપર એક વીડિયો પોસ્ટ કરીને નિવૃત્તિની જાહેરાત કરી હતી. ગંભીરે 147 મેચમાં 5238 રન બનાવ્યા છે.
રાહુલ દ્રવિડ - ટીમ ઇન્ડિયાની દિવાલ ગણાતા રાહુલ દ્રવિડે પણ જ્યારે નિવૃત્તિની જાહેરાત કરી ત્યારે કોઈને વિશ્વાસ થયો ન હતો. પોતાના ઘરેલું મેદાન ચિન્નાસ્વામી સ્ટેડિયમમાં એક ફંક્શન રુમમાં દ્રવિડે નિવૃત્તિની જાહેરાત કરી હતી. દ્રવિડે 344 વન-ડેમાં 10889 અને 164 ટેસ્ટમાં 13288 રન બનાવ્યા છે.
