IND vs NZ: બીજી ટી-20માં રોહિત શર્મા બનાવી શકે છે આ ખાસ રેકોર્ડ્સ

ભારત અને ન્યૂઝીલેન્ડ વચ્ચે બીજી ટી-20 મેચ ઓકલેન્ડમાં શુક્રવારે રમાશે. ભારતીય ટીમનો પ્રથમ મેચમાં ન્યૂઝીલેન્ડ સામે 80 રને પરાજય થયો હતો. જેથી બીજી ટી-20માં પરાજય થશે તો ભારત ત્રણ ટી-20ની શ્રેણી ગુમાવી દેશે. સુકાની રોહિત શર્મા પાસે બીજી ટી-20માં કેટલાક રેકોર્ડ બનાવવાની તક છે.

આંતરરાષ્ટ્રીય ટી-20માં વિરાટ કોહલી અને રોહિત શર્માએ 19 વખત પચાસ કે તેથી વધારે રન બનાવ્યા છે. જોકે રોહિત શર્માના નામે બે સદી પણ છે. જ્યારે વિરાટના નામે બધી અડધી સદી છે. જો રોહિત ઓકલેન્ડમાં અડધી સદી ફટકારશે તો તે 50થી વધારે રન બનાવવાના મામલે વિરાટને પાછળ રાખી દેશે.

રોહિત શર્મા આંતરરાષ્ટ્રીય ટી-20માં 100 સિક્સરથી બે કદમ દૂર છે. તેના નામે 91 મેચમાં 98 સિક્સરો છે. જો તે બે સિક્સરો ફટકારી દેશે તો સિક્સરોની સદી ફટકારનાર દુનિયાનો ત્રીજો ક્રિકેટર બની જશે. ક્રિસ ગેઈલ અને માર્ટિન ગુપ્ટિલના નામે 103 સિક્સર છે. સિક્સરોના મામલે બંને પ્રથમ ક્રમાંકે છે.

રોહિત શર્મા આંતરરાષ્ટ્રીય ટી-20માં સૌથી વધારે રન બનાવનાર બેટ્સમેન બનવાથી ફક્ત 35 રન દૂર છે. રોહિતે 91 મેચમાં 32.43ની એવરેજથી 2238 રન બનાવ્યા છે. ટોચના સ્થાને ન્યૂઝીલેન્ડનો ગુપ્ટિલ છે. તેના નામે 76 મેચમાં 2272 રન છે.

ન્યૂઝીલેન્ડ દુનિયાની એકમાત્ર ટીમ છે જેની સામે ભારતને જીત કરતા વધારે મેચોમાં હાર મળી છે. ટીમ ઇન્ડિયા કિવી ટીમ સામે 9 મેચ રમ્યું છે, જેમાં ફક્ત બે માં જીત મળી છે.