રોહિત શર્મા આજે તોડી શકે છે ક્રિસ ગેલનો આ સૌથી મોટો રેકોર્ડ

ભારતના તોફાની બેટ્સમેન રોહિત શર્મા વેસ્ટ ઈન્ડિઝના પ્રવાસે ટી20 સીરીઝમાં મોટો રેકોર્ડ પોતાના નામે કરવાની તૈયારીમાં છે. તે સ્ફોટક બેટિંગ માટે જાણીતા વિન્ડીઝના ક્રિસ ગેલને પાછળ ધકેલી શકે છે. રોહિત વિન્ડીઝની વિરુદ્ધ શનિવારે રમાનારી પહેલી ટી20 આંતરરાષ્ટ્રીય ક્રિકેટ મેચમાં જો ચાર સિક્સર મારે છે તો તે આ ફોર્મેટમાં સૌથી વધુ સિક્સર મારવાનો ક્રિસ ગેલનો રેકોર્ડ પોતાના નામે કરી લેશે. રોહિતના નામે 94 ટી20 મેચોમાં 102 સિક્સર છે જ્યારે ક્રિસ ગેલે માત્ર 58 મેચોમાં 105 સિક્સર ફટકારી છે.

આ યાદીમાં ગેલ બાદ બીજા સ્થાને ન્યૂઝીલેન્ડનો માર્ટિન ગુપ્ટિલ છે જેણે 76 મેચોમાં 103 સિક્સર મારી છે. રોહિતની પાસે ગેલનો રેકોર્ડ તોડવાની તક હશે કારણ કે ગેલ ત્રણ મેચોની આ ટી20 સીરીઝનો હિસ્સો નથી. તે જોકે એક દિવસીય સીરીઝમાં રમશે.

રોહિત ટી20 આંતરરાષ્ટ્રીયમાં સૌથી વધુ રન કરનારો ખેલાડી છે. તેણે 32.37ની સરેરાશથી 2331 રન કર્યા છે. જેમાં ચાર સદી અને 16 અડધી સદી સામેલ છે. રોહિત આ સીરીઝમાં વર્લ્ડ કપની લયને કાયમ રાખવા માંગશે.

તેણે વર્લ્ડ કપમાં રેકોર્ડ પાંચ સદીઓ ફટકારી હતી. તેણે શ્રીલંકાના કુમાર સંગકારાને પાછળ છોડી દીધો. સંગકારાએ એક વર્લ્ડ કપમાં ચાર સદી ફટકારી હતી.

આમ તો, વર્લ્ડ કપ બાદ ચર્ચાનો મુદ્દો રોહિતના પદર્શન કરતાં કેપ્ટન વિરાટ કોહલી સાથે તેના કથિત અબોલા વધુ રહ્યો. જોકે, કોહલીએ વિન્ડીઝ માટે રવાના થતાં પહેલા સ્પષ્ટ કરી દીધું કે તેના તથા રોહિતની વચ્ચે કોઈ પ્રકારના મતભેદ નથી. પરંતુ રોહિત તરફથી આ સંબંધમાં કોઈ નિવેદન નથી આવ્યું.

તેણે થોડા દિવસ પહેલા એક ચોંકાવનારું ટ્વિટ કર્યુ હતું. રોહિતે લખ્યું હતું કે, હું માત્ર મારી ટીમ માટે નથી રમતો. હું મારા દેશ માટે રમું છું. તેણે ફરી એકવાર બંનેની વચ્ચે મતભેદ થવાના અહેવાલોને હવા આપી દીધી હતી.