કેમ પૃથ્વી શોની ઇજાએ વિરાટની ઊંઘ ઉડાડી દીધી છે?

ફક્ત 18 વર્ષની ઉંમરમાં આંતરરાષ્ટ્રીય ક્રિકેટમાં ડેબ્યૂ કરનાર પૃથ્વી શો એ ક્રિકેટ જગતમાં તહલકો મચાવ્યો છે. વેસ્ટ ઇન્ડીઝ સામેની ડેબ્યૂ શ્રેણીમાં ધમાલ મચાવ્યા પછી શો હાલ ઓસ્ટ્રેલિયાના પ્રવાસે છે. જોકે ટેસ્ટ શ્રેણી પહેલા તેની ઈજાએ ટીમ ઇન્ડિયાને પરેશાનીમાં મુકી દીધી છે. તે પ્રથમ ટેસ્ટમાંથી બહાર થઈ ગયો છે. આખરે દુનિયાભરના પ્રશંસકો કેમ પૃથ્વી શો ના દિવાના છે અને ઓસ્ટ્રેલિયા પ્રવાસમાં ન રમતા વિરાટ સામે કેમ મુશ્કેલી ઉભી થઈ શકે છે.

1947થી લઈને અત્યાર સુધી ટીમ ઇન્ડિયા ઓસ્ટ્રેલિયા સામે ટેસ્ટ શ્રેણી જીતી શક્યું નથી. ક્રિકેટ જાણકારોના મતે ટીમ ઇન્ડિયા પાસે આ વખતે શ્રેણી જીતવાની શાનદાર તક છે. જોકે પૃથ્વી શો ના રમે તો ટીમ ઇન્ડિયાએ લોકેશ રાહુલ અને મુરલી વિજય પાસે ઓપનિંગ કરવી પડશે. હાલ વિજય અને રાહુલ ખાસ ફોર્મમાં નથી. જેથી પૃથ્વીની ઇજા ભારત માટે ઝટકો છે.

ટેસ્ટ કારકિર્દીની પ્રથમ મેચમાં પૃથ્વીએ ધમાકેદાર શતકીય ઇનિંગ્સ રમી હતી. વિન્ડીઝ સામે રાજકોટ ટેસ્ટમાં 134 રનની ઇનિંગ્સ રમી હતી. તેણે 99 બોલમાં સદી પુરી કરી હતી. જે ટેસ્ટ ક્રિકેટમાં ડેબ્યૂ કરતા ત્રીજી ફાસ્ટેસ્ટ સદી હતી.

અત્યાર સુધી બે ટેસ્ટમાં પૃથ્વીએ 118.50ની એવરેજથી 237 રન બનાવ્યા છે. ઓસ્ટ્રેલિયાના પ્રવાસમાં પ્રેક્ટિસ મેચમાં 69 બોલમાં 66 રનની શાનદાર ઇનિંગ્સ રમી હતી. આમ તેની પાસે ધમાકેદાર પ્રદર્શનની આશા રાખવામાં આવી રહી છે.

જ્યારે પૃથ્વી 14 વર્ષનો હતો ત્યારે સચિન તેંડુલકર મુંબઈના એક ગ્રાઉન્ડ પર ગયો હતો. ત્યારે સચિને તેની બેટિંગ જોઈ કહ્યું હતું કે આવનાર દિવસોમાં આ યુવક ટીમ ઇન્ડિયા તરફથી રમશે.

ફર્સ્ટ ક્લાસમાં ડેબ્યૂ કરતા પૃથ્વીએ સદી ફટકારી હતી. દલીપ ટ્રોફીમાં પણ ડેબ્યૂ રતા સદી ફટકારી હતી. ફક્ત 17 વર્ષની ઉંમરમાં સચિન તેંડુલકરનો રેકોર્ડ તોડ્યો હતો. 2018માં પૃથ્વી શો ની કેપ્ટનશિમાં ટીમ ઇન્ડિયા અંડર-19 વર્લ્ડ કપમાં ચેમ્પિયન બન્યું હતું.

2013માં 14 વર્ષના પૃથ્વીએ હેરિસ શીલ્ડ અંડર-16 ઇન્ટર સ્કૂલ ક્રિકેટ ટૂર્નામેન્ટમાં ફક્ત 330 બોલ પર 546 રનની રેકોર્ડતોડ ઇનિંગ્સ રમી હતી. ક્રિકેટના જાણકારોના મતે પૃથ્વી ટીમ ઇન્ડિયાનો આગામી સચિન તેંડુલકર છે. કહેવાય છે કે તેની પાસે સેહવાગ જેવી ટેકનિક અને સચિન જેવી ટેમ્પરામેન્ટ છે.