ટેરિટોરિયલ આર્મી સાથે લગભગ બે સપ્તાહ પસાર કર્યા પછી લેફ્ટિનેન્ટ કર્નલ એમએસ ધોની દિલ્હી પરત ફર્યો છે. ધોની શુક્રવારે પરત ફર્યો હતો. તે લેહથી સીધો દિલ્હી ગયો હતો. વેસ્ટ ઇન્ડીઝ પ્રવાસે ન જતા ધોની 30 જુલાઈએ ટેરિટોરિયલ આર્મી સાથે જોડાયો હતો અને બે સપ્તાહ સુધી ટ્રેનિંગ લીધી હતી.
ઘણા દિવસો પછી પુત્રી ઝીવા દિલ્હીમાં પોતાના પિતા એમએસ ધોનીને મળી તો ભેટી પડી હતી. ધોનીના પ્રશંસક ક્લબે ઝીવાની તસવીર શેર કરી હતી. પિતાએ જેવી ઝીવાને ગળે લગાડી તો તે ભાવુક બની ગઈ હતી.
ધોનીના પ્રશંસકોએ ધોનીની તસવીરો સોશિયલ મીડિયામાં શેર કરી છે. લેહ એરપોર્ટ પર ધોનીએ સામાન્ય વ્યક્તિની જેમ તપાસ કરાવી હતી. ધોની કાશ્મીર ઘાટીમાં ટ્રેનિંગ માટે હતો. આ પછી તે નવા કેન્દ્ર શાસિત પ્રદેશમાં લદ્દાખમાં ગયો હતો. જ્યાં તે આર્મી હોસ્પિટલમાં દર્દીઓને મળ્યો હતો.
લેહ એરપોર્ટ પર ધોનીએ પોતાના પ્રશંસકો સાથે ફોટો પણ પડાવ્યા હતા. ધોનીએ ટ્રેનિંગ દરમિયાન પેટ્રોલિંગ પણ કરી હતી. તે ઉરી અને અનંતબાગ પણ ગયો હતો.
