ભારતીય મહિલા વન-ડે ટીમની કેપ્ટન મિતાલી રાજે ન્યૂઝીલેન્ડ મહિલા ક્રિકેટ ટીમ સામે હેમિલ્ટન વન-ડેમાં રમવા ઉતરતાની સાથે જ એક નવી સિદ્ધિ મેળવી છે. મિતાલી 200મી વન-ડે રમવા ઉતરી હતી. આવી સિદ્ધિ મેળવનાર તે વર્લ્ડની પ્રથમ મહિલા ખેલાડી બની છે.
ન્યૂઝીલેન્ડ સામે આઈસીસી મહિલા ચેમ્પિયનશિપની ત્રીજી વન-ડેમાં ભારતનો 8 વિકેટે પરાજય થયો હતો. જોકે ભારતે આ શ્રેણી 2-1થી પોતાના નામે કરી લીધી છે. ત્રીજી વન-ડેમાં ભારત 149 રનમાં ઓલઆઉટ થઈ ગયું હતું. જવાબમાં ન્યૂઝીલેન્ડે 29.2 ઓવરમાં 2 વિકેટ ગુમાવી પડકાર મેળવી લીધો હતો. મિતાલી 200મી વન-ડેમાં 9 રન જ બનાવી શકી હતી.
1999માં વન-ડે ક્રિકેટમાં ડેબ્યૂ કરનાર મિતાલીએ અત્યાર સુધી 200 વન-ડેમાં 51.33ની એવરેજથી 6622 રન બનાવ્યા છે. જે એક વર્લ્ડ રેકોર્ડ છે. આ દરમિયાન તેણે સાત સદી ફટકારી છે. મિતાલી ફક્ત 13 મેચમાં જ ટીમનો ભાગ બની શકી નથી. ઇંગ્લેન્ડની ચાર્લોટ એડવર્ડ્સ 191 વન-ડે સાથે બીજા નંબરે છે.
જો કેપ્ટન મિતાલીની વાત કરવામાં આવે તો તેણે ભારતીય ટીમને અત્યાર સુધી 123 મેચમાં લીડ કરી છે. આ પણ એક વર્લ્ડ રેકોર્ડ છે. ઇંગ્લેન્ડની ચાર્લોટ એડવર્ડ્સ (117) બીજા નંબરે છે.
