ભારત અને વેસ્ટ ઈન્ડિઝની વચ્ચે જમૈકાના સબીના પાર્ક મેદાનમાં રમાઈ રહેલી બીજી અને અંતિમ ટેસ્ટ મેચમાં ભારતના યુવા બોલર જસપ્રીત બુમરાહે જોરદાર બોલિંગ કરતાં હેટ્રિક લીધી છે. આ તેની કારકિર્દીની પહેલી હેટ્રિક છે.
બુમરાહ આ હેટ્રિકની સાથે ટેસ્ટ ક્રિકેટમાં હેટ્રિક લેનારો ત્રીજો ભારતીય બોલર બની ગયો છે. આ પહેલા ઈરફાન પઠાણ અને હરભજન સિંહ ટેસ્ટ ક્રિકેટમાં હેટ્રિક લઈ ચૂક્યા છે.
વેસ્ટ ઈન્ડિઝની વિરુદ્ધ બીજી ટેસ્ટના બીજા દિવસે પહેલી ઇનિંગમાં ટીમ ઈન્ડિયા 416 રન પર ઓલઆઉટ થઈ ગઈ. ત્યારબાદ જસપ્રીત બુમરાહે ધારદાર બોલિંગ કરતાં વિન્ડીઝના 5 બેટ્સમેનોને પોતાની છઠ્ઠી ઓવરમાં જ પેવેલિયન મોકલી દીધા. તેણે ચોથી ઓવરમાં હેટ્રિક લેતાં ડેરેન બ્રાવો, શમારા બ્રૂક્સ અને રોસ્ટર ચેઝને આઉટ કર્યા.
બુમરાહે ચોથી ઓવરમાં ડેરેન બ્રાવોને 4 રને કેએલ રાહુલના હાથે કેચ આઉટ કરાવી દીધો. ત્યારબાદ બ્રુક્સને શૂન્ય રને એલબીડબલ્યૂ આઉટ કર્યો. જોકે બ્રુક્સે રિવ્યૂ પણ લીધો, પરંતુ તે સફળ ન રહ્યો અને તેને આઉટ જાહેર કરવામાં આવ્યો. ત્યારબાદના બોલમાં બુમરાહે રોસ્ટન ચેઝને પણ શૂન્ય રને એલબીડબલ્યૂ આઉટ કરી પેવેલિયન મોકલી દીધો.
હેટ્રિક લેનારો ત્રીજો ભારતીય બોલર બન્યો બુમરાહ : બુમરાહની કારકિર્દીની આ પહેલી હેટ્રિક છે. ટેસ્ટમાં તે આ સિદ્ધિ મેળવનારો ત્રીજો ભારતીય બોલર બની ગયો છે.
