IPL 2022: ચેમ્પિયન બનવાનું વિરાટ કોહલીનું સપનું ફરી રોળાયું, RCBના 900 કરોડ અને કોહલીના 150 કરોડ પાણીમાં!

વિરાટ કોહલી અત્યાર સુધી એક ખેલાડી તરીકે IPLનું ટાઇટલ જીતી શક્યો નથી. તે શરૂઆતથી જ આરસીબીનો ભાગ છે અને ટીમ અત્યાર સુધી ટાઈટલ જીતવામાં સફળ રહી નથી. RCBની ટીમ T20 લીગની સતત ત્રીજી સિઝનમાં પ્લેઓફમાં પહોંચી હતી ચેમ્પિયન બનવા સફળ રહી નથી.

ટી-20 લીગના ઈતિહાસમાં RCB ટીમે સૌથી વધુ પૈસા ખેલાડીઓને ખરીદવામાં ખર્ચ્યા છે. તેણે અત્યાર સુધીમાં લગભગ 910 કરોડ રૂપિયાનો ખર્ચ કર્યો છે. તો બીજી તરફ કોહલીને પગાર તરીકે લગભગ 158 કરોડ રૂપિયા મળ્યા છે. પરંતુ ટીમ અને કોહલી બંનેનું આઈપીએલ જીતવાનું સપનું હજુ અધુરું રહી ગયું છે.

વિરાટ કોહલીએ ટી-20 લીગની વર્તમાન સિઝન પહેલા ટીમની કેપ્ટનશિપ છોડી દીધી હતી. આ પછી ટીમે તેને 15 કરોડ રૂપિયામાં રિટેન કર્યો હતો. ફાફ ડુ પ્લેસિસને ટીમની કમાન સોંપવામાં આવી હતી. લીગ રાઉન્ડ બાદ ટીમ ટેબલમાં ચોથા નંબરે હતી. આ પછી તેણે એલિમિનેટરની મેચમાં લખનઉ સુપર જાયન્ટ્સને હરાવ્યું હતું.

ટીમ અજમાવી ચૂકી છે 7 કેપ્ટન - આઇપીએલમાં RCB ટીમના ઈતિહાસની વાત કરીએ તો તે RCB અત્યાર સુધીમાં 7 કેપ્ટનને અજમાવી ચૂક્યું છે. પરંતુ કોઈ તેને જીત અપાવી શક્યું નથી. કોહલી અને ડુ પ્લેસિસ ઉપરાંત અનિલ કુંબલે, ડેનિયલ વેટ્ટોરી, રાહુલ દ્રવિડ, કેવિન પીટરસન અને શેન વોટસન પણ કમાન સંભાળી ચુક્યા છે અને બધા નિષ્ફળ ગયા છે.

IPL 2022ની ફાઇનલમાં 29મી મે એ રાજસ્થાન રોયલ્સનો મુકાબલો ગુજરાત ટાઇટન્સ સામે થશે. હાર્દિક પંડ્યાના નેતૃત્વમાં ગુજરાતે પ્રથમ સિઝનમાં શાનદાર પ્રદર્શન કર્યું છે. આવી સ્થિતિમાં તેની નજર પ્રથમ ટાઈટલને પોતાના નામે કરવા પર રહેશે. બીજી તરફ રાજસ્થાનની ટીમ 2008ની પોતાની જીતનું પુનરાવર્તન કરવા માંગે છે. ક્રિકેટ પ્રશંસકોમાં પણ ફાઇનલ મુકાબલાને લઇને અનેરો ઉત્સાહ છે અને સૌની નજર આ ખાસ મેચ પર રહેશે.