IPL UNSOLD PLAYERS: રૈના સહિત આ દિગ્ગજો પર કોઇએ બોલી ના લગાવી, 3 તો કેપ્ટન પણ રહી ચૂક્યા છે

બેંગલુરુ : આઈપીએલ ઓક્શન 2022માં (IPL Auction 2022) જ્યાં કરોડો રૂપિયાની બોલી લાગી રહી છે. બીજી તરફ કેટલાક એવા દિગ્ગજો પણ છે જેમને બેસ પ્રાઇસ પણ મળી રહી (IPL UNSOLD PLAYERS)નથી. મિસ્ટર આઈપીએલ કહેવાતા સુરૈશ રૈના (Suresh Raina)આવો જ ખેલાડી છે જેનું નામ અનસોલ્ડ પ્લેયર્સમાં (UNSOLD PLAYERS)નોંધાયું છે. રૈનાના નામે આઈપીએલમાં ઘણા એવા રેકોર્ડ છે જે બીજા માટે ફક્ત સપનું છે. આઈપીએલ-2022ના (IPL 2022) અનસોલ્ડ પ્લેયર્સમાં આશ્ચર્યજનક રુપથી સ્ટિવ સ્મિથ, ડેવિડ મિલર અને શાકિબ અલ હસનનું નામ પણ સામેલ છે.

સુરૈશ રૈના પર આ વખતે કોઇ ટીમે બોલી લગાવી નથી. તે ગત સિઝનમાં ચેન્નાઈ સુપર કિંગ્સ તરફથી રમ્યો હતો. તેણે પોતાની બેસ પ્રાઇઝ 2 કરોડ રૂપિયા રાખી હતી. રૈના પર બોલી ના લગાવતા ક્રિકેટપ્રેમીઓ ચકિત રહી ગયા છે. જ્યારે ચેન્નાઈ સુપર કિંગ્સ ઉપર 2 વર્ષ માટે પ્રતિબંધ મુક્યો હતો ત્યારે સુરેશ રૈના ગુજરાત લાયન્સ તરફથી રમ્યો હતો. તે ટીમનો કેપ્ટન પણ હતો.

ઓસ્ટ્રેલિયાના સ્ટિવ સ્મિથ ઉપર પણ કોઇએ બોલી લગાવી નથી. તેણે પોતાની બેસ પ્રાઇઝ 2 કરોડ રૂપિયા રાખી હતી. સ્ટિવ સ્મિથ રાજસ્થાન રોયલ્સ અને રાઇઝિંગ સુપર જાયન્ટ્સ ટીમનો કેપ્ટન પણ રહ્યો હતો.

દક્ષિણ આફ્રિકાના ડેવિડ મિલરને પણ ખરીદદાર મળ્યા નથી. તેણે પોતાની બેસ પ્રાઇઝ 1 કરોડ રૂપિયા રાખી હતી. તેના નામે ટી-20 ક્રિકેટની સૌથી ઝડપી સદી છે. ડેવિડ મિલર આઈપીએલમાં પંજાબ કિંગ્સની કેપ્ટનશિપ પણ કરી ચૂક્યો છે.

શાકિબ અલ હસન ઉપર પણ કોઇએ બોલી લગાવી નથી. તેણે પોતાની બેસ પ્રાઇઝ 2 કરોડ રૂપિયા રાખી હતી. બાંગ્લાદેશના આ ખેલાડીએ ગત વર્ષે આઈપીએલમાં રમવા માટે પોતાની નેશનલ ટીમ સાથે દક્ષિણ આફ્રિકા જવાથી ઇન્કાર કર્યો હતો. શાકિબ બાંગ્લાદેશનો કેપ્ટન પણ રહી ચૂક્યો છે.