ચેન્નઈ સુપરકિંગ્સના વોટ્સએપ ગ્રૂપથી બહાર થયો રૈના, વાપસી માટે ધોની સાથે કરી રહ્યો છે વાત!

નવી દિલ્હી : પૂર્વ ભારતીય બેટ્સમેન સુરેશ રૈના (Suresh Raina)જ્યારથી આઈપીએલ (IPL 2020) શરૂ થતા પહેલા ભારત પાછો ફર્યો છે ત્યારથી આ મુદ્દો મોટો વિવાદ બની ગયો છે. ટીમના માલિક એન શ્રીનિવાસનના (N Srinivasan)વિવાદિત નિવેદન પછી એમ માનવામાં આવતું હતું કે ચેન્નઈ સુપરકિંગ્સ (Chennai Super Kings)અને રૈના વચ્ચે બધું ઠીક નથી. હવે એવા સમાચાર આવી રહ્યા છે કે સીએસકેએ રૈનાને ટીમના વોટ્સએપ ગ્રૂપમાંથી બહાર કરી દીધો છે.

રિપોર્ટ પ્રમાણે રૈના જે દિવસે ભારત પરત ફર્યો હતો તેના બીજા જ દિવસે તેને ટીમના વોટ્સએપ ગ્રૂપમાંથી બહાર કરી દીધો હતો. સૂત્રોએ જણાવ્યું કે જે દિવસે તે પાછો ફર્યો તેના બીજા જ દિવસે તેને સીએસકેના ગ્રૂપમાંથી બહાર કરી દીધો હતો. તે હવે ટીમ મેનેજમેન્ટ, કોચ અને સીઇઓ સાથે વાપસી માટે વાત કરી રહ્યો છે.

ચેન્નઈ સુપરકિંગ્સે રૈનાના સ્થાને હજુ સુધી કોઈ ખેલાડીને રિપ્લેસમેન્ટ માટે બોલાવ્યો નથી. ટીમના સીઇઓનું કહેવું છે કે કેપ્ટન ધોની, કોચ ફ્લેમિંગ વર્તમાન ટીમથી સંતુષ્ઠ છે. તેમણે નવા ખેલાડીની માંગણી કરી નથી.

કાશી વિશ્વનાથનને રૈનાના ફ્રેન્ચાઇઝી સાથે ભવિષ્ય વિશે પુછવામાં આવ્યું તો તેમણે કહ્યું હતું કે ટીમ પોતાના બધા ખેલાડીઓનું પુરુ સમર્થન કરે છે. તેમણે કહ્યું હતું કે તેના કેટલાક વ્યક્તિગત મુદ્દા ચાલી રહ્યા છે. તેથી તે જ્યારે પણ ફિટ હોય અને તૈયાર હોય તે પાછો આવી શકે છે. અમે આવું જ ઇચ્છીએ છીએ.