IPL 2020: દિનેશ કાર્તિકને કેપ્ટનપદેથી હટાવવાની ભવિષ્યવાણી 12 દિવસ પહેલા થઈ ગઈ હતી!

નવી દિલ્હી : આઈપીએલ-2020માં (IPL 2020) કોલકાતા નાઇટ રાઇડર્સની કેપ્ટનશિપ કરી રહેલા દિનેશ કાર્તિકે (dinesh karthik) ટીમની કેપ્ટનશિપ છોડી દીધી છે. કાર્તિકે સિઝનની વચ્ચે જ કેપ્ટનશિપ છોડી દીધી છે. કાર્તિકના સ્થાને ઇયોન મોર્ગન કોલકાતા નાઇટ રાઇડર્સની કેપ્ટનશિપ કરશે. કાર્તિકની કેપ્ટનશિપ છોડવાની અટકળો ઘણા સમયથી કરવામાં આવી રહી હતી. ટીમ ઇન્ડિયાના ક્રિકેટર મનોજ તિવારીએ તો 12 દિવસ પહેલા જ તેને કેપ્ટન પદેથી હટાવવાની આશંકા વ્યક્ત કરી હતી.

મનોજ તિવારી (Manoj Tiwary) આ સિઝનમાં કોઈ ટીમનો ભાગ નથી પણ તે ક્રિકેટ એક્સપર્ટ તરીકે ક્રિકબઝ સાથે જોડાયેલ છે. મનોજ તિવારીએ 4 ઓક્ટોબરે આ વાતની આશંકા વ્યક્ત કરી હતી કે દિનેશ કાર્તિકને કેપ્ટન પદેથી હટાવવામાં આવી શકે છે અને તેના સ્થાને ઇયોન મોર્ગનને જવાબદારી મળી શકે છે. મનોજ તિવારીએ ટ્વિટ કરીને લખ્યું હતું કે આ સિઝનમાં કેકેઆર જેવી મોટી ટીમની કેપ્ટનશિપ છોડવા માટે હિંમતની જરૂર હોય છે. મને વિશ્વાસ છે કે દિનેશ કાર્તિક બેટ્સમેન તરીકે શાનદાર પ્રદર્શન કરશે.

દિનેશ કાર્તિકની કેપ્ટનશિપ છોડવા પર ઇરફાન પઠાણે પણ પોતાની પ્રતિક્રિયા આપી છે. ઇરફાને લખ્યું કે સિઝનની વચ્ચે કેપ્ટન બદલવો ટીમના ખેલાડીઓ માટે સહજ ના હોય. આશા છે કે કેકેઆર અહીંથી રસ્તો ભટકશે નહીં. કેકેઆર પ્લેઓફની રેસમાં છે.

આકાશ ચોપડાએ લખ્યું કે કેકેઆરનો આજે મુકાબલો છે અને તેમણે આ નિર્ણય કર્યો છે. ઇયોન મોર્ગનનું આઈપીએલ-2020માં ફોર્મ એવું નથી જેટલી તેની પાસે આશા છે. ટૂર્નામેન્ટમાં વધુ એક ટીમ છે જેનો વિદેશી કેપ્ટન ખરાબ ફોર્મમાંથી પસાર થઈ રહ્યો છે.