કોહલીએ રચ્યો ઈતિહાસ, વિદેશમાં આ રેકોર્ડ કરનારો બન્યો પહેલો ભારતીય કેપ્ટન

ટીમ ઈન્ડિયાએ મેલબોર્ન ક્રિકેટ ગ્રાઉન્ડમાં રમાયેલી બોક્સિંગ ડે ટેસ્ટમાં ઓસ્ટ્રેલિયાને 137 રને હરાવીને ઈતિહાસ રચ્યો છે ઉપરાંત કેપ્ટન વિરાટ કોહલીએ પણ એક ખાસ રેકોર્ડ પોતાના નામે કરી લીધો છે. મેચની ચોથી ઇનિંગમાં 399 રનનો ટાર્ગેટ લઈને ઉતરેલી ઓસ્ટ્રેલિયન ટીમ 261 રન પર આઉટ થઈને મેચ ગુમાવી બેઠી, જે તેની બોક્સિંગ ડે ટેસ્ટમાં ભારતની વિરુદ્ધ પહેલી હાર છે. અત્યાર સુધી 1985થી બંને ટીમોની વચ્ચ આઠ મેચ રમાઈ છે, જેમાંથી ભારતે એક તો ઓસ્ટ્રેલિયાએ પાંચ જીતી છે જ્યારે એક મેચ ડ્રો રહી છે.

આ મેચ કેપ્ટન વિરાટ કોહલી માટે એટલા માટે ઐતિહાસિક છે કારણ કે તેણે મેલબોર્ન બંને ઇનિંગને ડિક્લેર કરવાનું જોખમ લીધું હતું. તે વિદેશી ધરતી પર મેચની બંને ઇનિંગ ડિક્લેર કરનારા સૌરવ ગાંગુલી અને રાહુલ દ્રવિડ બાદ ત્રીજો ભારતીય કેપ્ટન છે. જ્યારે જીત માત્ર તેમના જ ભાગમાં આવી છે.

ભારતીય ટીમે પહેલીવાર સૌરવ ગાંગુલીની કેપ્ટન્સીમાં 2004માં ઓસ્ટ્રેલિયા વિરુદ્ધ સિડનીમાં પોતાની બંને ઇનિંગ (પહેલી 705/7 અને બીજી 211/2) ડિક્લેર કરી હતી અને મેચ ડ્રો રહી હતી. જ્યારે 2007માં આવું બીજી વાર થયું હતું જ્યારે કેપ્ટન રાહુલ દ્રવિડે બાંગ્લાદેશની વિરુદ્ધ ચટગાંવમાં પહેલી ઇનિંગ (387/8) અને બીજી ઇનિંગ (100/6) ડિક્લેર કરી હતી અને આ પણ ટેસ્ટ ડ્રો રહી હતી.

ઓસ્ટ્રેલિયા પર બોક્સિંગ ડે ટેસ્ટમાં 137 રનોની જીતની સાથે કોહલી વિદેશી ધરતી પર મેચની બંને ઇનિંગ ડિક્લેર કર્યા બાદ જીત મેળવનારો ભારતનો પહેલો કેપ્ટન બન્યો છે. આ ઈતિહાસ રચવાના કારણે કોહલીના ટીકાકારોને પણ વળતો જવાબ મળી ગયો છે.

આ ઉપરાંત ભારતે બીજી ઇનિંગ ઓસ્ટ્રેલિયામાં સીરીઝમાં બે મેચ જીતવાનો રેકોર્ડ કાયમ કર્યો છે અને તે આવું કરનારી એકમાત્ર એશિયન ટીમ છે. ચાર મેચોની સીરીઝમાં ભારત 2-1થી આગળ છે. ભારતે આ પહેલાં 1977-78માં બે મેચ જીતી હતી.