દાદા સુભાષ ચંદ્ર બોઝ સાથે દેશ માટે યુદ્ધ લડ્યા હતા, હવે ટીમ ઇન્ડિયામાં 'ધમાલ' કરશે પૌત્ર

વેસ્ટ ઇન્ડિઝ પ્રવાસ માટે ભારતીય પસંદગી ટીમે ફાસ્ટ બોલર નવદીપ સૈનીની ટીમ ઇન્ડિયામાં પસંદગી કરી છે. નવદીપની વન ડે અને ટી 20 માટે પસંદગી કરવામાં આવી છે. નવદીપ સૈની આઇપીએલમાં રોયલ ચેલેન્ઝર્સ બેંગલુરુ માટે રમે છે, તે દિલ્હી રણજીનો પણ હિસ્સો છે. નવદીપ સૈની ફાસ્ટ બોલિંગ માટે જાણીતો છે, પરંતુ તેના જીવનમાં એવી ઘણી વાતો છે જેના વિશે બહુ ઓછા લોકો જાણતા હશે.

નવદીપ સૈનીના પિતા અમરજીત સિંહ સૈની એક ડ્રાઇવર હતા. તેના પિતા હરિયાણા સરકારમાં ડ્રાઇવરની નોકરી કરતા હતા. ઓછો પગાર હોવા છતાં તેણે નવદીપને ક્યારેક કોઈ ખોટ વર્તાવા દીધી નથી.

નવદીપના દાદા કરમસિંહની ઉંમર 100થી વધારે છે. તેઓ દેશ માટે યુદ્ધ લડ્યા હતા. કરમસિંહ નેતાજી શુભાષ ચંદ્ર બોઝની ઇન્ડિયન નેશનલ આર્મીમાં સૈનિક હતા. નવદીપ સૈનીના દાદાને ક્રિકેટ વિશે વધારે માહિતી નથી પરંતુ તેઓ તેના પૌત્રને ટીવી પર જુએ છે ત્યારે ખુશ થઈ જાય છે.

નવદીપ સૈની પહેલા ટેનિસ બોલ ટૂર્નામેન્ટ રમતો હતો. તે આ રમતમાં રૂ.200થી રૂ. 200 જીતતો હતો. આ પૈસાથી તેણે કરનાલ પ્રીમિયર લીગમાં નસીબ અજમાવ્યું હતું, જે બાદમાં તેની જિંદગી બદલાઈ ગઈ હતી. દિલ્હીના ફાસ્ટ બોલર સુમિત નરવાલે સૈનીની ખૂબી ઓળખી લીધી અને તેની મુલાકાત ગૌતમ ગંભીર સાથે કરાવી હતી.

નવદીપ સૈનીની કારકિર્દી બનાવવા પાછળ ગંભીરનો બહુ મોટો ફાળો છે. ગંભીરે તેની તમામ મદદ કરી હતી. દિલ્હીની રણજીમાં નવદીપને મોકો આપવા માટે ગંભીર પસંદગી ટીમ સાથે લડ્યો હતો.