સતત ત્રીજી સદી ફટકારી કોહલીએ કર્યો રેકોર્ડનો વરસાદ, આટલા બન્યા રેકોર્ડ

ટીમ ઇન્ડિયાનો ત્રીજી વન-ડેમાં 43 રને પરાજય થયો હતો. જોકે વિરાટ કોહલીએ ફરી એક વખત બધાનું દિલ જીતી લીધું હતું. કોહલીએ પોતાની વન-ડે કારકિર્દીની 38મી સદી ફટકારીને ઘણા રેકોર્ડ પોતાના નામે કર્યા હતા. કોહલી જે રીતે બેટિંગ કરીને અવનવા રેકોર્ડ કરી રહ્યો છે તે જોતા લાગે છે કે આવનાર સમયમાં મોટાભાગના ક્રિકેટના રેકોર્ડ તેના નામે હશે.

કોહલીએ વન-ડેમાં સતત ત્રીજી સદી ફટકારી હતી. સતત ત્રણ સદી ફટકારનાર તે ભારતનો પ્રથમ અને દુનિયાનો 10મો બેટ્સમેન બન્યો છે. કુમાર સંગાકારા દુનિયાનો એકમાત્ર બેટ્સમેન છે જે સતત ચાર સદી ફટકારી ચૂક્યો છે. તેણે આ સિદ્ધિ 2015માં મેળવી હતી. હવે જોવું રસપ્રદ રહેશે કે કોહલી સંગાકારાના આ રેકોર્ડની બરાબરી કરી શકે છે નહીં.

કોહલીની આંતરરાષ્ટ્રીય ક્રિકેટમાં આ 62મી સદી છે. આ સાથે તે સૌથી વધારે સદી ફટકારવાના મામલે જેક કાલિસની બરાબરી કરી લીધી છે. આમ તે સદી ફટકારવાના મામલે ચોથા નંબરે પહોંચી ગયો છે. તેની આગળ કુમાર સંગાકાર (63 સદી), રિકી પોન્ટિંગ (71 સદી) અને સચિન તેંડુલકર (100 સદી) જ છે. કોહલીઆ આ સિદ્ધિ ફક્ત 349 ઇનિંગ્સમાં મેળવી છે. જ્યારે બીજા બેટ્સમેનોએ 500થી વધારે ઇનિંગ્સ રમી છે.

કોહલીની વન-ડેમાં 59.90ની એવરેજ છે. વન-ડેમાં ઓછામાં ઓછા 5 હજાર રન બનાવનાર બેટ્સમેનોમાં તેની એવરેજ સૌથી વધારે છે. તેના પછી માઇકલ બેવન (53.6), એબી ડી વિલિયર્સ (53.5) અને ધોની (50.5)નો નંબર આવે છે.

કોહલીના ડે-નાઇટ વન-ડેમાં 8000 રન પુરા થઈ ગયા છે. આવી સિદ્ધિ મેળવનાર તે દુનિયાનો ત્રીજો બેટ્સમેન છે. તેના સિવાય સચિન તેંડુલકર અને સંગાકારાએ આ સિદ્ધિ મેળવી છે.

કોહલીએ સદી ફટકારી ત્યારે ભારતની ધરતી ઉપર પ્રથમ વખત ટીમ ઇન્ડિયાનો પરાજય થયો છે.

ભારતની ધરતી ઉપર કોહલીની આ સતત ચોથી સદી છે. તેના સિવાય આવી સિદ્ધિ ડી વિલિયર્સે મેળવી છે.

આંતરાષ્ટ્રીય ક્રિકેટમાં સુકાની દ્વારા સૌથી વધારે સદી ફટકારવાના મામલે કોહલી બીજા નંબરે આવી ગયો છે. પોન્ટિંગ 41 સદી સાથે પ્રથમ સ્થાને છે. ગ્રીમ સ્મિથ અને કોહલી 33-33 સદી સાથે બીજા ક્રમે છે.