ટીમ ઈન્ડિયા પહેરશે ગરદન બચાવનારી હેલ્મેટ? BCCIએ આપ્યો આ જવાબ

માથાના પાછલા ભાગ, ગરદન અને કાનપટી પર બોલ વાગવાથી બચાવનારી હેલ્મેટ વિશે બીસીસીઆઈએ ભારતીય ખેલાડીઓ સાથે વાતચીત કરી છે પરંતુ ગરદનની સુરક્ષાવાળી હેલ્મેટ પહેરવાનો નિર્ણય ક્રિકેટરો પર છોડી દીધો છે. જોકે તેને અનિવાર્ય કરવાની માંગ સતત થતી રહી છે.

બીજી એશિઝ ટેસ્ટ મેચ દરમિયાન જોફ્રા આર્ચરનો બોલ સ્ટીવ સ્મિથની ગરદન પર વાગ્યો હતો ત્યારબાદ ચક્કર આવવાના કારણે તે આ મેચમાં આગળ રમી નહોતો શક્યો. ત્યારબાદ ઓસ્ટ્રેલિયન ટીમના ર્સ્પોર્ટ્સ મેડિસિન હેડ કહ્યું કે તેના ક્રિકેટરો માટે વહેલી તકે ગરદનની સુરક્ષાવાળી હેલ્મેટ પહેરવી અનિવાર્ય કરવામાં આવી શકે છે.

બીસીસીઆઈએ આપ્યું આ નિવેદન : બીસીસીઆઈના એક સિનિયર અધિકારીએ નામ ખાનગી રાખવાની શરતે પીટીઆઈને જણાવ્યું કે, બોલ વાગતાં ચક્કર આવવાથી નિયમ પ્રભાવી થયા બાદ બીસીસીઆઈએ કેપ્ટન અને કોચિંગ સ્ટાફને તેના વિશે જાણકારી આપી. અમે તેમને ગરદનની સુરક્ષા કરનારી હેલ્મેટ વિશે જણાવ્યું. શિખર ધવન સહિત કેટલાક ખેલાડી તેનો ઉપયોગ કરે છે પરંતુ અમે તેમને ફરજ ન પાડી શકીએ.

વેસ્ટ ઈન્ડિઝના બોલરોથી ખતરો : વિન્ડીઝની પાસે બે એવા બોલર છે જે ટીમ ઈન્ડિયાના બેટ્સમેનો વિરુદ્ધ બાઉન્સર્સનો ઉપયોગ કરી શકે છે. શનોન ગેબરિયલ અને કીમાર રોચની પાસે ઝડપ છે અને બંને બોલર બાઉન્સર્સનો પ્રયોગ કરે છે. એવામાં ટીમ ઈન્ડિયાના બેટ્સમેનો પર ઈજાનો ખતરો ઊભો રહેશે.

ઈજા થઈ તો સબ્સટીટ્યૂટ ખેલાડી ઉતરશે મેદાનમાં : ગરદનની સુરક્ષાવાળી હેલ્મેટ પહેરવી ભલે ફરજિયાત ન થઈ હોય પરંતુ આઈસીસી ક્રિકેટ સમિતિએ તેની પર વિસ્તારપૂર્વક ચર્ચા કરી અને બોલ વાગતાં ચક્કર આવવાની સ્થિતિમાં સબ્સટીટ્યૂટ ખેલાડીની વ્યવસ્થા કરી જે બેટિંગ અને બોલિંગ કરી શકે છે. ઓસ્ટ્રેલિયાએ બીજી એશિઝ ટેસ્ટમાં તેનો ઉપયોગ કર્યો અને સ્મિથના સ્થાને માર્નસ લાબુશેન સબ્સટીટ્યૂટ ખેલાડીના રૂપમાં ઉતર્યો.