પ્રથમ વન-ડેમાં ભારતની સંભવિત પ્લેઇંગ ઇલેવન, નંબર-4 ઉપર કોણ?

વેસ્ટ ઇન્ડીઝને ટી-20 શ્રેણીમાં 3-0થી હરાવ્યા પછી હવે ટીમ ઇન્ડિયાનો આગામી લક્ષ્યાંક વન-ડે શ્રેણી જીતવાનો છે. જેનો પ્રારંભ 8 ઓગસ્ટથી થઈ રહ્યો છે. પ્રથમ વન-ડે મેચ ભારતીય સમય પ્રમાણે સાંજે 7 કલાકે ગયાનામાં રમાશે. એ વાત બધા જાણે છે કે ટીમ ઇન્ડિયા વન-ડેમાં વેસ્ટ ઇન્ડીઝ પર ભારે છે પણ ખાસ વાત એ છે કે કોહલી વન-ડેમાં કોને-કોને તક આપશે.

અમે તમને બતાવી રહ્યા છીએ કે પ્રથમ વન-ડેમાં ટીમ ઇન્ડિયાની સંભવિત પ્લેઇંગ ઇલેવન કેવી હોઈ શકે છે? ઓપનિંગમાં રોહિત શર્મા અને શિખર ધવનનું સ્થાન નિશ્ચિત છે. ધવન ટી-20 શ્રેણીમાં ભલે ફ્લોપ રહ્યો હોય પણ વન-ડે ફોર્મેટમાં તેના રમવાનો અંદાજ અને પ્રદર્શન શાનદાર છે.

ત્રીજા નંબરે વિરાટ કોહલી રમશે. જોકે સવાલ ચોથા નંબરને લઈને છે. નંબર 4 માટે લોકેશ રાહુલ, મનીષ પાંડે, શ્રેયસ ઐયર અને રિષભ પંત દાવેદાર છે. વર્લ્ડ કપ અને ટી-20 શ્રેણીમાં પંતે ચોથા નંબરે બેટિંગ કરી હતી. તો બની શકે તે વન-ડેમાં પણ ચોથા નંબરે બેટિંગ કરે. નંબર 5 ઉપર મનીષ પાંડેને તક મળી શકે છે. જ્યારે 6 નંબરે કેદાર જાધવ કે શ્રેયસ ઐયરમાંથી કોઇ એક રમશે.

નંબર 7 ઉપર ઓલરાઉન્ડર જાડેજા બેટિંગ કરી શકે છે. બોલિંગની વાત કરવામાં આવે તો ભુવનેશ્વર કુમારને આરામ આપી નવદીપ સૈનીને વન-ડે ડેબ્યૂની તક આપવામાં આવી શકે છે. ચહલ અને કુલદી યાદવના રુપમાં બે સ્પિનર પણ ટીમમાં સામેલ થઈ શકે છે. મોહમ્મદ શમીને પણ પ્લેઇંગ ઇલેવનમાં તક મળી શકે છે.

આવી રહે છે સંભવિત ટીમ - રોહિત શર્મા, શિખર ધવન, વિરાટ કોહલી, રિષભ પંત, મનીષ પાંડે, કેદાર જાધવ/શ્રેયસ ઐયર, રવીન્દ્ર જાડેજા, કુલદીપ યાદવ, યુજવેન્દ્ર ચહલ, નવદીપ સૈની, મોહમ્મદ શમી.