IND vs AUS: ઓસ્ટ્રેલિયા સામે 1992 વર્લ્ડ કપની જર્સી પહેરીને મેદાનમાં ઉતરશે ટીમ ઇન્ડિયા, જુઓ Photos

નવી દિલ્હી : વિરાટ કોહલીની આગેવાનીમાં ત્રણ વન-ડે, ત્રણ ટી-20 અને ચાર ટેસ્ટ મેચની શ્રેણી માટે ઓસ્ટ્રેલિયાના પ્રવાસે ગયેલી ટીમ ઇન્ડિયા જૂના રંગમાં જોવા મળશે. 27 નવેમ્બરે વન-ડે શ્રેણી સાથે ભારત પોતાના પ્રવાસની શરૂઆત કરશે. આ પહેલા ટીમ ઇન્ડિયાને નવી કિટ મળી ગઈ છે. ઓપનર બેટ્સમેન શિખર ધવને રેટ્રો જર્સીની તસવીર સોશિયલ મીડિયામાં શેર કરી છે.

આ જર્સીનો રંગ નેવી બ્લૂ છે. ભારતીય ક્રિકેટ ટીમ 80ના દાયકામાં આ પ્રકારની જર્સી પહેરીને મેદાનમાં ઉતરતી હતી. 1992ના વર્લ્ડ કપમાં પણ ટીમ આ પ્રકારની જર્સીમાં જોવા મળી હતી.

ટીમ ઇન્ડિયાની આ રેટ્રો જર્સી 80ના દાયકાની જર્સી જેવી જ છે. ધવને તસવીર શેર કરતા લખ્યું કે નવી જર્સી, નવો ઉત્સાહ, અમે છીએ તૈયાર.

હાલમાં જ ટીમ ઇન્ડિયાને નવી કિટ સ્પોન્સર MPL મળી છે. જેનો લોગો પણ જર્સી પર છે. આ પહેલા નાઇકી કિટ સ્પોન્સર હતી.

27 નવેમ્બરથી 2 ડિસેમ્બર સુધી ટીમ ઇન્ડિયા વન-ડે શ્રેણી, 4 થી 8 ડિસેમ્બર સુધી ટી-20 શ્રેણી અને 17 ડિસેમ્બરથી 19 જાન્યુઆરી 2021 સુધી ટેસ્ટ શ્રેણી રમશે.