અગ્રવાલને ‘ફૂટબોલ’ જેવો દેખાય છે બોલ, આવી રીતે સખત કરી મહેનત

મેલબોર્ન ટેસ્ટના પ્રથમ દિવસે ભારતીય બેટ્સમેનોએ પોતાની ધાક બતાવી હતી. ભારતે પ્રથમ દિવસના અંતે 2 વિકેટ ગુમાવી 215 રન બનાવી લીધા છે. ભારતની શાનદાર શરુઆત પાછળ સૌથી મોટો રોલ ઓપનર મયંક અગ્રવાલે ભજવ્યો હતો. તેણે પોતાની ડેબ્યૂ ટેસ્ટમાં 76 રન બનાવ્યા હતા. આજે બધા મયંક અગ્રવાલની પ્રશંસા કરી રહ્યા છે પણ તમે જાણો છો આ બેટ્સમેને ભારતની ટેસ્ટ કેપ પહેરવા માટે કેટલી મહેનત કરી છે? આજે અમે તેની મહેનત વિષે જણાવી રહ્યા છીએ.

મયંક અગ્રવાલની બેટિંગ પ્રેક્ટિસ ઘણી સખત હતી. તમને જાણીને વિશ્વાસ નહીં થાય કે મયંક રોજ 1000 બોલ રમતો હતો. મયંકે પોતે વિઝડનને આપેલા ઇન્ટરવ્યૂમાં આ વાતનો ખુલાસો કર્યો હતો. મયંક અગ્રવાલે ખુલાસો કર્યો હતો કે મારા બેટિંગ કોચ આર એક્સ મુરલીધરે મારા ઉપર સખત મહેનત કરી છે. હું રોજ 700થી 1000 બોલ રમતો હતો. તેને બોલ ફૂટબોલ જેવો દેખાતો હતો.

મયંક અગ્રવાલે એ પણ બતાવ્યું હતું કે તે ફક્ત બોલ રમતો જ ન હતો વિકેટની વચ્ચે રન પણ ભાગતો હતો. આટલું જ નહીં બોલ પર ધ્યાન લગાવવા માટે તેમે ભારતીય મેડિટેશન પદ્ધતિ વિપાસનાનો પણ સહારો લીધો હતો. આ પ્રકારની ટ્રેનિંગથી મયંક અગ્રવાલની બોલ પર સારી નજર રહે છે. સાથે તેનો સ્ટેમિના અને સંયમ પણ વધી ગયો છે.

મયંક અગ્રવાલે ગત રણજી સિઝનમાં 13 ઇનિંગ્સમાં 105.45ની એવરેજથી 1160 રન બનાવ્યા હતા. જેમાં એક ત્રેવડી સદી સહિત 5 સદી અને 2 અડધી સદી ફટકારી હતી. મયંકે વિજય હઝારે ટ્રોફી 2018માં 8 ઇનિંગ્સમાં 90.37ની એવરેજ અને 107.91ની સ્ટ્રાઇક રેટથી 723 રન બનાવ્યા છે. જેમાં 3 સદી અને 4 અડધી સદી ફટકારી હતી.

1947 પછી પ્રથમ એવો ભારતીય ક્રિકેટર છે જેણે ઓસ્ટ્રેલિયામાં ડેબ્યૂ ટેસ્ટમાં અડધી સદી ફટકારી છે. સાથે મયંક ઓસ્ટ્રેલિયામાં ડેબ્યૂ ટેસ્ટમાં સૌથી વધારે રન બનાવનાર ભારતીય બની ગયો છે. મયંક આ શ્રેણીમાં અડધી સદી ફટકારનાર પ્રથમ ભારતીય ઓપનર છે.