દારૂના નશામાં મેક્સવેલે ચલાવી હતી સાઇકલ, મુક્યો હતો જીવ જોખમમાં

ઓસ્ટ્રેલિયાના ઓલરાઉન્ડર ગ્લેન મેક્સવેલ પર એક મોટો ખુલાસો થયો છે. મુંબઈ મિરરની ખબર પ્રમાણે આઈપીએલ 2017માં ગ્લેન મેક્સવેલે શરાબ પીને સાઇકલ ચલાવી હતી અને પોતાનો જીવ જોખમમાં મુક્યો હતો.

મુંબઈ મિરરમાં આવેલા રિપોર્ટ પ્રમાણે આઈપીએલ-10માં ગુજરાત લાયન્સ સામેના મુકાબલા પહેલા કિંગ્સ ઇલેવન પંજાબનો સુકાની ગ્લેન મેક્સવેલ ગુજરાત લાયન્સની પાર્ટીમાં ગયો હતો. આ પાર્ટીમાં ગ્લેન મેક્સવેલે ઘણો દારૂ પીધો હતો.

દારૂના નશામાં મેક્સવેલે રિસોર્ટમાંથી હોટલ સુધી જવા માટે સાઇકલનો ઉપયોગ કર્યો હતો. બીસીસીઆઈના અધિકારીનું માનવામાં આવે તો મેક્સવેલને પોતાના પર કાબુ રહ્યો ન હતો અને તે સાઇકલમાંથી નીચે પડી ગયો હતો. રસ્તા વચ્ચે પડેલા મેક્સવેલને કોઈ ગાડી કચડીને જઈ શકતી હતી.

મેક્સવેલ રસ્તા વચ્ચે પડ્યો હતો તો એક વ્યક્તિએ તેને ઓળખી લીધો હતો. તે વ્યક્તિએ મેક્સવેલને હોટલ સુધી પહોંચાડ્યો હતો. આ પછી ટીમના સુરક્ષાકર્મીઓએ સાઇકલને રિસોર્ટ સુધી પહોંચાડી દીધી હતી. આ મામલે બીસીસીઆઈએ ક્રિકેટ ઓસ્ટ્રેલિયાને એક ઇ-મેલ પણ કર્યો હતો પણ ત્યાંથી કોઈ જવાબ આવ્યો ન હતો.

ઉલ્લેખનીય છે કે મેક્સવેલ હાલમાં જ ટીવી ચેનલ અલ જઝીરા તરફથી જાહેર કરેલી ડોક્યુમેન્ટ્રીમાં સ્પોટ ફિક્સિંગ સાથે જોડાયેલા આરોપ પર ગુસ્સો વ્યક્ત કર્યો હતો. અલ જઝીરાએ થોડાક મહિના પહેલા જ ડોક્યુમેન્ટ્રીમાં ક્રિકેટ ફિક્સિંગ સાથે જોડાયેલી વાતોને બહાર લાવી હતી. જેમાં ભારત અને ઓસ્ટ્રેલિયા વચ્ચે રાંચીમાં 2017માં રમાયેલી ટેસ્ટ મેચ પણ સામેલ હતી. આઈસીસીએ આ મામલે તપાસના આદેશ આપ્યા છે. માનવામાં આવે છે કે આ મામલે મેક્સવેલની પુછપરછ થઈ શકે છે. જોકે મેક્સવેલે બધા આરોપને પાયા વિહોણા ગણાવ્યા છે.