હાર્દિક પંડ્યાની 5 કરોડની 2 ઘડિયાળ મુંબઇ એરપોર્ટ પર જપ્ત, સંતોષકારક જવાબ ન આપતા થઇ કાર્યવાહી

ક્રિકેટર હાર્દિક પંડ્યાની રૂપિયા પાંચ કરોડની બે ઘડિયાળને મુંબઇ એરપોર્ટ પર કસ્ટમ વિભાગ દ્વારા જપ્ત કરી લેવામાં આવી છે. તેની પાસે આ બંને ઘડિયાળનાં ઈનવોઈસ ન હતા. એટલું જ નહીં, તેણે આ બંને લક્ઝુરિયસ વૉચ ડિક્લેર પણ કરી ન હતી.

T20 વર્લ્ડકપ રમીને હાર્દિક પંડ્યા યુએઈથી ભારત પરત ફરી રહ્યો હતો. મુંબઈ એરપોર્ટ પર કસ્ટમ વિભાગે તેની તપાસ કરી હતી. આ દરમિયાન 5 કરોડની બે ઘડિયાળ મળી આવી હતી. ઘડિયાળઅંગે પુછાયેલા પ્રશ્નોનાં હાર્દિક પંડ્યાએ જે જવાબ આપ્યા હતાં તે કસ્ટમ વિભાગને સંતોષકારક નહોતા લાગ્યાં જે બાદ કસ્ટમ વિભાગે રૂ. પાંચ કરોડની બંને ઘડિયાળ જપ્ત કરી લીધી હતી

હાલમાં સમગ્ર ICC ટી-20માં હાર્દિક પંડ્યા ફ્લોપ સાબિત થયો છે. એક ઑલરાઉન્ડર તરીકે તેની પાસે ટીમને સારા દેખાવની આશા હતી, પરંતુ ટી-20 વર્લ્ડ કપની ત્રણ ઈનિંગમાં તે માંડ 69 રન કરી શક્યો છે.

આ પહેલા હાર્દિકનો ભાઈ કૃણાલ પંડ્યા પણ ઘડિયાળને લઈને ફસાયો હતો. કસ્ટમ વિભાગે તેની પણ મોંધી દાટ વિદેશી લક્ઝુરિયાસ વૉચ જપ્ત કરી લીધી હતી.

વર્ષ 2019માં હાર્દિક પંડ્યાએ હોસ્પિટલના બેડ પરથી એક તસવીર શેર કરી હતી જેમા પણ તેણે ઘડિયાળ પહેરી હતી. તેના પરથી અંદાજ લગાવી શકાય તે લક્ઝુરિયસ ઘડિયાળનો કેટલો શોખીન છે.