રવિ શાસ્ત્રીને ફરી એકવાર ટીમ ઈન્ડિયાના હેડ કોચ પદ માટે પસંદ કરવામાં આવ્યા છે. રવિ શાસ્ત્રીને આગામી બે વર્ષ માટે એટલે કે 2021 સુધી હેડ કોચ તરીકે પસંદગી કરવામાં આવી છે. મુંબઈમાં કપિલ દેવની આગેવાનીવાળી ક્રિકેટ સલાહકાર સમિતિએ રવિ શાસ્ત્રીના નામની જાહેરાત કરી.
કપિલ દેવે કહ્યું કે ન્યૂઝીલેન્ડના માઇક હેસન અને પૂર્વ ઓસ્ટ્રેલિયન ઓલરાઉન્ડર ટોમ મૂડીએ રવિ શાસ્ત્રીને જોરદાર ટક્કર આપી. છેવટે કેવી રીતે રવિ શાસ્ત્રીએ માઇક હેસન અને ટોમ મૂડીને કોચ પદની રેસમાં હરાવી દીધા, આવો જાણીએ તેના પાંચ કારણ.
1. વિરાટ કોહલીનું સમર્થન : રવિ શાસ્ત્રીના હેડ કોચ પદે ચાલુ રાખવાનું સૌથી મોટું કારણ વિરાટ કોહલીનું સમર્થન રહ્યું. કોહલીએ વિન્ડીઝ રવાના થતાં પહેલા રવિ શાસ્ત્રીના સમર્થનમાં નિવેદન આપ્યું હતું. વિરાટે કહ્યું હતું કે ટીમ ઈન્ડિયાના તમામ ખેલાડી રવિ શાસ્ત્રીને કોચ બનાવવાના પક્ષમાં છે.
2. ઓસ્ટ્રેલિયામાં ઐતિહાસિક સીરીઝ જીતી : રવિ શાસ્ત્રીના કોચિંગમાં જ ટીમ ઈન્ડિયાએ ઓસ્ટ્રેલિયામાં ઐતિહાસિક ટેસ્ટ સીરીઝ જીતી. ભારતે ઓસ્ટ્રેલિયા પ્રવાસમાં 2-1થી સીરીઝ પોતાના નામે કરી હતી.
3. શાનદાર ટેસ્ટ રેકોર્ડ : રવિ શાસ્ત્રીના કોચિંગમાં ટીમ ઈન્ડિયાનો ટેસ્ટ રેકોર્ડ જોરદાર રહ્યો. ભારતે 21માંથી 11 ટેસ્ટ જીતી. 7 મેચમાં ભારતીય ટીમને હાર મળી અને 3 મેચ ડ્રો રહી.
4. વનડેમાં પણ શ્રેષ્ઠ રેકોર્ડ : રવિ શાસ્ત્રી કોચ તરીકે કાર્યકાળમાં ભારતીય ટીમે 63માંથી 45 મેચ જીતી અને માત્ર 15માં તેને હાર મળી. વનડેમાં ભારતની જીતની ટકાવારી 71.4 ટકા રહી.
5. અંશુમાન ગાયકવાડનું સમર્થન : ક્રિકેટ એડવાઇઝરી કમિટીના સભ્ય અંશુમાન ગાયકવાડે પણ રવિ શાસ્ત્રીનું જાહેરમાં સમર્થન કર્યુ હતું. અંશુમને રવિ શાસ્ત્રીને પસંદ કર્યા બાદ નિવેદન આપ્યું કે તેઓ ટીમને જાણે છે, દરેક ખેલાડીને જાણે છે, ભારતીય ક્રિકેટ ટીમની સિસ્ટમ જાણે છે. જ્યારે બીજા દાવેદારોને એક નવી શરૂઆત નવી શરૂઆત કરવી પડતી.
