ઈંગ્લેન્ડે ન્યૂઝીલેન્ડની વિરુદ્ધ સુપરઓવરમાં જીત મેળવીને પહેલીવાર વર્લ્ડ કપ પોતાના નામે કર્યો. ક્રિકેટના જનક આ દેશને પોતાન નામની આગળ વર્લ્ડ ચેમ્પિયનનું લેબલ લગાવવામાં 48 વર્ષ લાગ્યા. જોકે, ઈંગ્લેન્ડના આયરિશ કેપ્ટન ઓયન મોર્ગને આ સપનું પૂરું કરી દીધું અને ટીમે તેની આગેવાનીમાં લોર્ડ્સના ઐતિહાસિક મેદાન પર આ ઉપલબ્ધિ મેળવી.
હવે જ્યારે ઓયન મોર્ગને ક્રિકેટના ઈતિહાસમાં પોતાનું નામ નોંધાવી દીધું છે તો બીજી તરફ તેના ભવિષ્યને લઈને પણ અટકળોનું બજાર ગરમ થઈ ગયું છે.
ઈંગ્લેન્ડના પૂર્વ કેપ્ટન એન્ડ્યૂ સ્ટ્રોસે તો કેપ્ટનના વિકલ્પ તરીકે ખૂબ જ મજબૂતીથી જોસ બટલરનું નામ સામે મૂકી દીધું છે. તેમનું માનવું છે કે મોર્ગન કેપ્ટન્સી છોડ્યા બાદ બટલર ટીમને આગળ લઈને જવા ક્ષમતા ધરાવે છે.
હવે મોર્ગન પોતે પણ એ વાતનો સંકેત આપી દીધો છે કે તે 2023માં ભારતમાં યોજનારા વર્લ્ડ કપમાં ટીમનો કેપ્ટન નહીં રહે અને તેણે હજુ ભવિષ્યને લઈ નિર્ણય નથી લીધો.
મોર્ગને કહ્યું કે મેં હાલ એ વાતનો નિર્ણય નથી લીધો કે હું વર્લ્ડ કપ જીત્યા બાદ સીમિત ઓવર ફોર્મેટમાં ઈંગ્લેન્ડનો કેપ્ટન ચાલુ રહીશ કે નહીં. જો હું કહું કે 2023 સુધી રમવાનું ચાલુ રાખીશ તો એ મોટું કમિટમેન્ટ હશે.
જોકે, આવતા વર્ષે યોજાનારા ટી-20 વર્લ્ડ કપ સુધી આવું કરવું વધુ તર્કસંગત લાગે છે. મને નથી લાગતું કે હું હાલ તેની પર કોઈ નિર્ણય લેવાની સ્થિતિમાં છું.
માનવામાં આવી રહ્યું છે કે મોર્ગન ટૂંક સમયમાં કેપ્ટન્સી છોડી શકે છે અને જો તેણે આવું કર્યુ તો એ વાતની શક્યતા ખૂબ ઓછી છે કે તે બેટ્સમેન તરીકે ટીમની સાથે જોડાયેલો રહે. એવી સ્થિતિમાં તે કેપ્ટન્સી છોડવા અને આંતરરાષ્ટ્રીય ક્રિકેટને અલવિદા કહેવાનો નિર્ણય એક સાથે લઈ શકે છે. આશા એવી છે કે મોર્ગન ટી-20 વર્લ્ડ કપ બાદ આવતા વર્ષ આ રમતની અલવિદા કહી દેશે.
