આઈસીસી વર્લ્ડ કપ 2019માંથી ટીમ ઈન્ડિયા બહાર થઈ ગઈ છે. પરંતુ હારને લઈ પોસ્ટમોર્ટમ સતત ચાલુ છે. ટીમ ઈન્ડિયાના પૂર્વ કેપ્ટન અને મહાન બેટ્સમેન સુનીલ ગાવસ્કર સેમીફાઇનલમાં ધોનીની બેટિંગ પોઝિશનને લઈ ખૂબ નારાજ છે.
ગાવસ્કરે કહ્યું છે કે ધોનીને સાતમા નંબરે મોકલવાનો નિર્ણય ખૂબ આશ્ચર્યમાં મૂકનારો છે. ઉલ્લેખનીય છે કે, ભારત ન્યૂઝીલેન્ડ સામે સેમીફાઇનલમાં 18 રને હારી ગયું હતું. (Photo-AP)
'આશ્ચર્યમાં મૂકનારો નિર્ણય' : ગાવસ્કરના જણાવ્યા મુજબ, ધોનીને ચોથી વિકેટ પડ્યા બાદ બેટિંગ માટે આવવું જોઈતું હતું. તેમણે મેચના એક દિવસ બાદ સ્ટાર સ્પોર્ટ્સ સાથેની વાતચીતમાં જણાવ્યું કે, જ્યારે 24 રને ચાર વિકેટ પડી ગઈ તો તે સમયે એક જ મિજાજના બે બેટ્સમેનોને તમે ન મોકલી શકો.
ગાવસ્કરે કહ્યું કે, પંત અને પંડ્યા બંને આક્રમક બેટ્સમેન છે. અહીં ધોનીને બેટિંગ માટે મોકલવો જોઈતો હતો. તે ક્રીઝ પર આવીને દર બીજા બોલે રિષભ પંત સાથે વાત કરી શકતો હતો. ટીમ મેનેજમેન્ટનો આ નિર્ણય આશ્ચર્યમાં મૂકનારો છે. અહીં સિલેક્શન કમિટીની કોઈ ભૂલ નથી. આ ટીમ મેનેજમેન્ટની ચૂક હતી.
ધોનીને લઈ વિરાટની સ્પષ્ટતા : મેચ બાદ પ્રેસ કોન્ફરન્સમાં વિરાટ કોહલીએ તેની પર સ્પષ્ટતા કરી હતી કે કેમ ધોનીને સાતમા નંબરે બેટિંગ માટે ઉતારવામાં આવ્યો હતો. કોહલીએ કહ્યું કે, શરૂઆતની મેચો બાદ એવો પ્લાન કરવામાં આવ્યો હતો કે ધોની નીચલા ઓર્ડરના બેટ્સમેનોનસ સાથે રમશે. તેણે જાડેજા સાથે સારી બેટિંગ કરી.
કોહલીએ વધુમાં કહ્યું કે, ટીમમાં યોગ્ય બેલેન્સ હોવું જરૂરી છે. જો એક ખેલાડી હિટ કરી રહ્યો છે, તો બીજાને વિકેટ બચાવીને રમવાની જરૂર હોય છે. ધોનીએ આ મેચમાં 72 બોલમાં 50 રનની ઇનિંગ રમી હતી. સાથોસાથ જાડેજાની સાથે સાતમી વિકેટ માટે 116 રનની ભાગીદારી કરી હતી.
સેમીફાઇનલમાં શું થયું હતું? - ન્યૂઝીલેન્ડની વિરુદ્ધ આ મહત્વપૂર્ણ મેચમાં ટીમ ઈન્ડિયાએ 24 રનના સ્કોરે 4 વિકેટ ગુમાવી દીધી હતી. ત્યારબાદ માનવામાં આવી રહ્યું હતું કે પૂર્વ કેપ્ટન મહેન્દ્રસિંહ ધોની બેટિંગ માટે આવશે પરંતુ હાર્દિક પંડ્યા ક્રીઝ પર આવ્યો. તેને જોઈ લોકો હેરાન રહી ગયા.
