MS Dhoni Retirement: સંન્યાસ લીધાના થોડા સમયમાં જ ધોનીને મળી ઇંગ્લન્ડની ટીમથી રમવાની મોટી ઓફર!

નવી દિલ્હીઃ મહેન્દ્ર સિંહ ધોની (MS Dhoni Retirement)એ ઇન્ટરનેશનલ ક્રિકેટને અલવિદા કહી દીધું છે અને તેની આ જાહેરાતના થોડાક જ કલાકમાં એક મોટી ઓફર પણ મળી ગઈ છે. પૂર્વ ઓસ્ટ્રેલિયન ક્રિકેટર અને ધ હન્ડ્રેડ લીગની ટીમ લંડન સ્પિરિટના મુખ્ય કોચ શેન વોર્ન (Shane Warne)એ ધોનીને પોતાની ટીમ તરફથી રમવા માટેની ઓફર આપી છે. આ ટૂર્નામેન્ટ આવતા વર્ષે ઇંગ્લેન્ડમાં યોજાશે.

ધ હન્ડ્રેડ ઇંગ્લેન્ડ ક્રિકેટ બોર્ડની એક પ્રયોગાત્મક ટૂર્નામેન્ટ છે, જે આ વર્ષે 8 ટીમોની સાથે લૉન્ચ થવાની હતી, પરંતુ દરેક ટીમ તરફથી 100 બોલવાળી આ ટૂર્નામેન્ટને કોરોના વાયરસના કારણે આવતા વર્ષ સુધી ટાળી દેવામાં આવી છે.

મહેન્દ્ર સિંહ ધોનીએ ઇન્ટરનેશનલ ક્રિકેટથી સંન્યાસ લઈ લીધો છે, પરંતુ બે વારના વર્લ્ડ કપ વિજેતા કેપ્ટન ધોની આઈપીએલ રમતો રહેશે. જોકે એવા પણ અહેવાલ સામે આવી રહ્યા છે કે તે ફ્રેન્ચાઇઝી બેઝ્ડ ટૂર્નામેન્ટ રમી શકે છે.

ધોનીએ આઈપીએલની તૈયારી માટે ચેન્નઈ પહોંચવાના આગલા દિવસે પોતાનો મોટો નિર્ણય ઇન્સ્ટાગ્રામ દ્વારા જાહેર કર્યો. તેણે એક વીડિયો શૅર કરતાં કહ્યું કે, તેને સાંજે 7:29 વાગ્યા પછીથી નિવૃત્ત માની લેવામાં આવે.

મહેન્દ્ર સિંહ ધોનીની સાથોસાથ સુરેશ રૈનાએ પણ ઇન્ટરનેશનલ ક્રિકેટથી સંન્યાસ લેવાની જાહેરાત કરી લીધી છે.